Watanabe styrktarsjóðurinn auglýsir eftir umsóknum um styrki til náms- og rannsóknadvala í Japan og á Íslandi fyrir skólaárið 2025-2026. Umsóknarfrestur er til og með 1. febrúar 2025. Sjóðurinn veitir styrki til nemenda og akademískra starfsmanna á öllum fræðasviðum Háskóla Íslands til náms- eða rannsóknadvalar í Japan og það sama gildir um nemendur og vísindamenn við japanska háskóla, sem eiga þess kost að fá styrk til dvalar við Háskóla Íslands. Nemendur í grunn- og framhaldsnámi geta sótt um ferða- og uppihaldsstyrk til allt að níu mánaða námsdvalar. Mánaðarlegur uppihaldstyrkur nemur 150.000 JPY vegna dvalar í Japan og 200.000 kr. vegna dvalar á Íslandi. Auk þess geta styrkþegar sem dvelja lengur en einn mánuð sótt um allt að 200.000 kr. í ferðastyrk. Sjóðurinn veitir ekki styrk fyrir skólagjöldum eða öðrum kostnaði. Akademískt starfsfólk getur sótt um allt að 500.000 kr. ferða- og dvalarstyrk til styttri dvalar (allt að einum mánuði), sem tengist fræðistörfum eða rannsóknasamstarfi milli Háskóla Íslands og háskóla í Japan. Tilgangur Watanabe-sjóðsins er að styrkja fræðileg tengsl Íslands og Japans. Stjórn Watanabe-sjóðsins metur umsóknir og velur styrkhafa. Stjórnin áskilur sér rétt til að hafna styrkumsókn. Umsóknir og fylgigögn skal senda með tölvupósti á netfangið watanabe@hi.is fyrir miðnætti 1. febrúar 2025. Athugið að umsóknir og fylgigögn eiga að vera á ensku. Umsóknareyðublað Fyrirspurnum skal beint á netfangið watanabe@hi.is eða í síma 525-4311. ---- Watanabe styrktarsjóðurinn var stofnaður við Háskóla Íslands árið 2008 með rausnarlegri gjöf Hr. Toshizo (Tom) Watanabe með það markmið að styrkja gagnkvæm fræðileg tengsl Íslands og Japans. Watanabe sjóðurinn veitir íslenskum háskólanemum og vísindamönnum einstakt tækifæri til að nema og starfa í japönsku háskólasamfélagi og það sama gildir um japanska nemendur og vísindamenn sem eiga þess kost að koma til Íslands. Frekari upplýsingar um sjóðinn og lokaskýrslur Um Tozisho Watanabe Hr. Tozisho (Tom) Watanabe stofnandi sjóðsins er formaður Toshizo Watanabe Foundation og stofnandi og fyrrverandi framkvæmdastjóri Nikkel Global fyrirtækisins sem hefur höfuðstöðvar í Bandaríkjunum. Hr. Watanabe hlaut styrk frá Wien International Scholarship Program (WISP) til náms við Brandeis háskólann í Massachusetts í Bandaríkjunum. Í Brandeis kynntist hann Geir H. Haarde, fyrrverandi forsætisráðherra og tókst með þeim góð vinátta. Hr. Watanabe er ævinlega þakklátur fyrir námsstyrkinn og þau tækifæri sem menntun hans í Bandaríkjunum veitti honum. Hann vildi því koma á fót sjóð til að styrkja ungt fólk til náms erlendis. Watanabe hafði samband við Geir H. Haarde, sinn gamla skólabróður, með það í huga að stofna styrktarsjóð við íslenskan háskóla og efla tengsl Íslands og Japan. Í kjölfarið var Watanabe-styrktarsjóðurinn við Háskóla Íslands stofnaður árið 2008. Stofnféð var 3 milljónir bandaríkjadala og árið 2018 bætti Hr. Watanabe veglegri peningagjöf við sjóðinn að upphæð tveimur milljónum bandaríkjadala.Stjórn sjóðsins Stjórn sjóðsins er skipuð þremur fulltrúum til þriggja ára. Rektor Háskóla Íslands skipar formann sjóðsins, Tom Watanabe og Geir Haarde, eða ættingjar þeirra, einn stjórnarmann hvor. Í stjórn sjóðsins sitja: Eiríkur Smári Sigurðarson, sérfræðingur og rannsóknastjóri við Hugvísindasvið, formaður stjórnar Toshizo „Tom“ Watanabe, stofnandi sjóðsins Geir H. Haarde, fyrrv. forsætisráðherra og sendiherra Staðfest skipulagsskrá SKIPULAGSSKRÁ Watanabe styrktarsjóðsins við Háskóla Íslands 1. grein Sjóðurinn heitir Watanabe styrktarsjóðurinn við Háskóla Íslands. Markmið hans er að veita alþjóðlega styrki til nemenda- og kennaraskipta, en stofnandi Watanabe styrktarsjóðsins er hr. Toshizo „Tom“ Watanabe. Hr. Watanabe er fyrrum skiptinemi í hinu virta og kunna nemendaskiptakerfi Wien International Scholarship Program (Alþjóðlega nemendaskiptakerfi Wien) við Brandeis háskólann í Massachusetts, Bandaríkjunum, þar sem hann hlaut B.S. gráðu sína í stjórnmálafræði árið 1973. Hann tók síðan MBA gráðu sína við Pepperdine háskólann í Kaliforníu, Bandaríkjunum, árið 1992 og varð síðan stjórnarformaður, forstjóri og einkaeigandi Nikken, vellíðunarvörufyrirtækis sem náð hefur góðum árangri og er með höfuðstöðvar í Bandaríkjunum. Hr. Watanabe vill tjá þakklæti sitt fyrir dýrmæta menntun með því að veita erlendum stúdentum svipað tækifæri með það að markmiði að auka velvild milli Japans og Íslands. Sjóðurinn er í umsjá og vörslu Styrktarsjóða Háskóla Íslands, Sæmundargötu 2. Heimili og varnarþing sjóðsins er í Reykjavík. 2. grein Tilgangur Watanabe styrktarsjóðsins er að veita styrki til skiptináms í Japan og á Íslandi, bæði nemendum í grunnnámi og framhaldsnámi, auk þess að stuðla að kennaraskiptum. Styrkir sjóðsins geta náð til uppihalds, ferða milli landanna og skólagjalda. 3. grein Stofnframlag sjóðsins er sem hér segir: Framlag Watanabe US$ 3.000.000 (kr. 278.040.000 m.v. gengi US$ 92,68 þann 16. September 2008) Stofnframlag sjóðsins, verðbætt, er óskerðanlegt. Tekjur sjóðsins eru eftirfarandi: Vextir og arður af eignum sjóðsins/vaxtatekjur af stofnfé. Fé, gjafir og annað verðmæti sem sjóðnum kann að áskotnast eða safnast í nafni sjóðsins. Styrktarsjóðir Háskóla Íslands annast ávöxtun sjóðsins og skal hún vera sem hagkvæmust á hverjum tíma og taka mið af fjárfestingastefnu Styrktarsjóða Háskóla Íslands. Heimilt er að úthluta styrkjum sem nema allt að þremur fjórðu af ávöxtun hvers reikningstímabils, að teknu tilliti til verðlagsbreytinga. Fjórðungur ávöxtunarinnar leggst við verðbætt stofnframlag og verður hluti af óskerðanlegu stofnfé. Reikningsár sjóðsins skal vera almanaksárið. Fyrsta reikningstímabil er frá staðfestingu skipulagsskrár til ársloka það ár. Reikningar sjóðsins skulu endurskoðaðir af endurskoðanda Styrktarsjóða Háskóla Íslands og þeir birtir með sama hætti og aðrir reikningar í vörslu Styrktarsjóða Háskóla Íslands. 4. grein Stjórn sjóðsins skipa þrír menn og er skipunartími stjórnar þrjú ár. Rektor Háskóla Íslands skipar formann sjóðsins. Hr. Toshizo „Tom“ Watanabe, eða fulltrúi afkomenda hans, og hr. Geir H. Haarde, eða fulltrúi afkomenda hans, skipa einn stjórnarmann hvor. Hlutverk stjórnar er að setja úthlutunarreglur og nánari starfsreglur um úthlutanir, svo sem einstakar styrkfjárhæðir, umsóknarfresti og ferli umsókna, innan ákvæða skipulagsskrár. Stjórnin hefur umsjón með styrkveitingum og gerir tillögur til rektors um úthlutanir styrkja. Sjóðsstjórn heldur formlega fundargerðarbók um starf sitt og afritum fundargerða skal skilað til Styrktarsjóða Háskóla Íslands. 5. grein Fyrsta úthlutun fer fram hið minnsta einu reikningsári eftir stofnun, enda liggi fyrir endurskoðuð reikningsskil og upplýsingar um laust fé til úthlutunar styrkja. Að jafnaði tilkynnir rektor Háskóla Íslands styrki við hátíðlega athöfn. Stjórn getur ákveðið í ljósi ávöxtunar eða annarra aðstæðna að safna saman leyfilegri úthlutun milli reikningsára, og úthluta í einu lagi lausum hlut samkvæmt reikningsskilum. Úthluta skal úr sjóðnum árlega eða sjaldnar eftir því sem sjóðsstjórn finnst tilefni til, en ekki má úthluta meira en ¾ af raunávöxtun sjóðsins skv. endurskoðuðum ársreikningi hans. Styrkþegar skulu skila skýrslu til stjórnar um framkvæmd og niðurstöður rannsókna. Slík skil eru forsenda frekari styrkveitinga. 6. grein Ekki er hægt að leggja sjóðinn niður eða gera breytingar á hlutverki hans og tilgangi, af öðrum ástæðum en kveðið er á um í lögum og ekki án þess að sjóðsstjórn og rektor Háskóla Íslands séu einhuga um þá ákvörðun. Verði sjóðurinn lagður niður skulu fjármunir hans renna til málefna tengdum tilgangi sjóðsins. 7. grein Leitað skal staðfestingar sýslumannsins á Sauðárkróki á skipulagsskrá þessari, sem og breytingum sem síðar kunna að verða. Reykjavík, 17. september 2008 Toshizo “Tom” Watanabe Kristín Ingólfsdóttir, rektor Háskóla Íslands Skipulagskrá þessi staðfestist hér með af sýslumanninum á Sauðárkróki skv. lögum um sjóði og stofnanir, sem starfa samkvæmt staðfestri skipulagskrá nr. 19/1988. facebooklinkedintwitter
