Broddflugan

Auk hefðbundinna formsatriða í umsóknareyðublaði (nöfn, námsleið, aldur, kennitala, sími og netföng) verði óskað eftir hnitmiðaðri lýsingu á verkefninu í 150 orðum þar sem fram komi heiti, markmið og samfélagslegt gildi verkefnisins. Í ítarlegri lýsingu komi fram nánari lýsing á markmiðum, framkvæmd og mati á mögulegum ávinningi verkefnisins fyrir samfélagið. Einnig komi fram hugmyndir umsækjenda um kynningu verkefnisins. Tíma- og fjárhagsáætlun fylgi einnig með sem fylgiskjal.

1. Í hverju umsóknarteymi skulu að lágmarki vera fjórir nemendur í bakkalár- og/eða meistaranámi. Þeir eru hvattir til að mynda teymi þvert á deildir og námsbrautir Menntavísindasviðs.
2. Úr sjóðnum er úthlutað tveimur milljónum króna á þriggja ára fresti.
3. Verkefni sem hljóti styrk verði að vera útfærð á þann veg að þau geti náð yfir langan tíma, 1-3 ár.
4. Teymi geta í umsóknarferlinu sóst eftir því að fá ráðgjöf frá mentor um tiltekna þætti. Einnig getur teymum verið úthlutaður mentor í framkvæmdaferlinu, til að vinna í ákveðnum þáttum hugmyndarinnar.
5. Styrkurinn er ekki hugsaður sem laun, heldur til að standa straum af ýmsum kostnaði sem tengst gæti framkvæmd og útfærslu verkefna.
6. Dómnefnd áskilur sér rétt til að hafna öllum umsóknum og auglýsa að nýju. 

Broddflugan getur stungið okkur óþægilega en hún getur einnig vakið okkur til umhugsunar og vitundar um tiltekin vandamál í samfélaginu. Heitið er einnig skemmtileg tilvísun í þann mæta fræðimann og fyrrum skólastjóra Kennaraskólans og fyrsta rektor Kennaraháskólans, Brodda Jóhannesson. Broddi var einn áhrifamesti skólamaður síðustu aldar á Íslandi og lagði áherslu á frelsi nemenda til að velja sér verkefni, taldi markmið skólastarfs vera að veita öllum nemendum jafnt sem kennurum tækifæri til þess að verða sjálfstæðir, skapandi einstaklingar sem eru tilbúnir til að takast á við viðfangsefni daglegs lífs.

Allar nánari upplýsingar um sjóðinn veitir Marta Goðadóttir, markaðs- og samskiptastjóri við Menntavísindasvið, martagodadottir@hi.is