Íslenskir rafrænir innviðir

• Háskóli Íslands
• Háskólinn í Reykjavík
• ÍSOR
• MATÍS
• Veðurstofa Íslands

Markmiðið með uppbyggingunni er að veita vísindafóki aðgang að öflugum, hagkvæmum og faglega reknum innviðakjarna án mikillar yfirbyggingar. Einnig er það markmið að samnýta auðlindir á upplýsingatæknisviði en það eitt og sér getur leitt til aukinnar skilvirkni og þekkingarsköpunar.

Viðfangsefni IREI er smíði á upplýsingatækniinnviðum sem og almennri upplýsingatækniráðgjöf fyrir vísindafólk. Smíði innviðanna er skipt í tvo megin verkfasa: grunnfasa og uppbyggingarfasa.

Í grunnfasa fer fram hönnun og þarfagreining innviða sem og innkaup á þeim búnaði sem innviðirnir byggja á. Fjárfest verður í:

• HPC (e. High Perfomance Computing, ofurtölvur) vélbúnaði
• Gagnalausnum
• Afritunarlausnum
• Gagnamiðlunarlausnum
• Eldveggjum
• Sértækum búnaði fyrir verkefnin Heilsubrunn og Mími II

Í uppbyggingarfasa er ætlunin að innleiða viðbætur sem þarf vegna samþættingar við kerfi utan innviðanna sjálfra, vegna miðlunar gagna og tenginga við innlendar og erlendar skýjalausnir. Haldið verður áfram að fjárfesta í búnaði eins og HPC nóðum, diskum, vélbúnaði og netlausnum.

Til að byrja með mun ráðgjöfin verða í tengslum við heilbrigðisvísindi. Innleiðing Heilsubrunns mun hafa mikið vægi sem og endurbætur á MÍMI sem grunn fyrir lífvísindi.
 

Í nútíma vísindarannsóknum eru gerðar æ meiri kröfur til upplýsingatækni og því hefur uppbyggingin áhrif á allar fræðigreinar vísindasamfélagsins.

Fræðigreinar sem við fyrstu sýn eru án beinnar tengingar við upplýsingatækni þurfa samt sem áður að treysta á aðgengilega og öfluga upplýsingatækniinnviði. Á sama tíma fleygir tækninni fram og verður bæði öflugri og flóknari. Það er stór áskorun fyrir mörg verkefni í vísindum að fylgja þessari þróun eftir.

Hugmyndin að gerð heildstæðs rafræns rannsóknarinnviðakjarna hefur verið í gerjun í þó nokkurn tíma. Þörfin fyrir öfluga, skalanlega og heildstæða upplýsingatækniinnviði eykst sífellt, það er að segja innviði sem bjóða upp á upplýsingatæknilega ráðgjöf, örugga varðveislu vísindagagna, skilvirka gagnavistun, aðgengi að miklu reikniafli og þjónustu vegna miðlunar gagna.

Flókið eða takmarkað aðgengi rannsóknaverkefna að upplýsingatækniinnviðum getur verið dýrkeypt og hætt við að óþarflega miklum auðlindum sé varið í þá yfirbyggingu á kostnað verkefnanna.

Innviðakjarninn er hugsaður sem lausn á þessari áskorun. Með notkun á nútíma tækni er hægt að búa til innviði sem mæta óskum vísindafólks um upplýsingatæknilegan stuðning og stuðla að því að efla íslenskt vísindastarf í alþjóðlegu samstarfi.

• Háskóli Íslands
• Háskólinn í Reykjavík
• ÍSOR
• MATÍS
• Veðurstofa Íslands
• Aðrar rannsóknastofnanir á Íslandi