Grunn- og framhaldsnemar á flestum námsleiðum hafa möguleika á að taka hluta námsins í skiptinámi. Misjafnt er eftir námsleið hvenær heppilegast er að fara í skiptinám og mikilvægt að hafa samráð við námsbrautarformann eða alþjóðafulltrúa viðkomandi deildar. Í skiptinámi er gert ráð fyrir að nemendur séu í fullu námi við gestaskólann, þ.e. 30 ECTS einingum á misseri eða samkvæmt viðmiðum gestaskólans. Almenn skilyrði fyrir skiptinámi Nemendur í grunnnámi geta aðeins sótt um námsdvöl erlendis ef námsleiðin þeirra í HÍ er a.m.k. 90 ECTS einingar. Nemendur í grunnnámi þurfa að hafa lokið a.m.k. 60 ECTS einingum á sinni námsleið við Háskóla Íslands áður en skiptinám hefst. Nemendur á 1. ári geta því sótt um skiptinám og farið út á 2. ári að því tilskildu að þeir hafi lokið 60 ECTS einingum við upphaf skiptináms. Miðað er við að nemendur eigi a.m.k. 22 ECTS einingar eftir af námskeiðum til að fara í skiptinám í eitt misseri og 44 ECTS einingar til að fara í tvö misseri. Athugið að ef farið er í skiptinám á lokamisseri náms gæti þurft að seinka brautskráningu þar sem sumir gestaskólar skila staðfestum einkunnum eftir brautskráningarfrest HÍ. Nemendur geta aðeins farið í skiptinám í aðalgrein en ekki í aukagrein. Hvort sem farið er í skiptinám í grunn- eða framhaldsnámi þurfa nemendur að taka a.m.k. helming námsins við Háskóla Íslands og útskrifast þaðan. Nemendur í framhaldsnámi geta aðeins sótt um námsdvöl erlendis ef námsleiðin þeirra í HÍ er a.m.k. 60 ECTS. Nemendur í framhaldsnámi þurfa að jafnaði að hafa lokið 30 ECTS á námsleið sinni til að geta farið í skiptinám. Nemendur sem stefna á framhaldsnám á sömu námsleið og í grunnnámi eru undanskildir þessari reglu. Nemendur verða að vera skráðir við HÍ og samþykktir í námið áður en fyrirhuguð námsdvöl hefst. Meistaranemar sem ekki eru með neinar einkunnir á meistaranámsferli verða að skila inn námsferilsyfirliti (einkunnum) úr grunnnámi með umsókn. Nemendur í doktorsnámi þurfa að vera samþykktir í námið áður en þeir geta sótt um skiptinám. Miðað er við að nemendur hafi meðaleinkunn 6,0 eða hærri þegar sótt er um skiptinám í HÍ. Ýmsir samstarfsskólar fara fram á hærri meðaleinkunnir en upplýsingar um það má finna á vefsíðum þeirra. Hægt er að sækja um undanþágu frá þessari reglu til Alþjóðasviðs. Undanþága getur t.d. verið ef nemandi á við námsörðugleika að stríða. Aðeins er hægt að sækja um eitt skólaár í einu. Ef nemandi vill framlengja skiptinám sitt frá vormisseri yfir á komandi haustmisseri þarf að sækja aftur um skiptinám hjá Alþjóðasviði fyrir 1. febrúar. Ekki er hægt að skipta sama skólaárinu milli tveggja gestaskóla, þ.e. ekki er hægt að fara út í fullt nám á haustmisseri í einn gestaskóla og skipta svo yfir í fullt nám við annan gestaskóla á vormisseri. Nemendur í diplómanámi á grunnstigi geta aðeins sótt um skiptinám ef námið er a.m.k. 90 ECTS einingar. Nemendur geta aðeins farið út í eitt misseri og verða að hafa lokið 60 ECTS áður en skiptinámið hefst. Nemendum er ekki heimilt að taka námskeið í fjarnámi meðan á skiptinámi stendur. Nemendur geta óskað eftir undanþágu frá þessu skilyrði ef ljúka þarf skyldunámskeiði við HÍ til þess að ná að brautskrást á tilsettum tíma. Einungis er heimilt að taka eitt námskeið í fjarnámi á misseri. Sum svið og deildir innan háskólans setja viðbótarskilyrði fyrir skiptinámi. Mikilvægt er að kynna sér vel skilyrði sem gilda fyrir nemendur í viðkomandi deild/sviði. Nemendur í örnámi geta ekki sótt um námsdvöl erlendis. Sérstök skilyrði sviða og deilda Sum svið og deildir innan háskólans setja viðbótarskilyrði fyrir skiptinámi. Mikilvægt er að kynna sér vel skilyrði sem gilda fyrir nemendur í viðkomandi deild/sviði. Félagsvísindasvið Félagsfræði-, mannfræði- og þjóðfræðideild: Meistaranemar í mannfræði verða að hafa lokið einu misseri í meistaranáminu áður en farið er í skiptinám. Námsbraut í mannfræði heimilar ekki nemendum að taka tungumálanámskeið í skiptinámi. Félagsráðgjafardeild: Í grunnnámi er nemendum ráðlagt að fara í skiptinám á haustmisseri á 2. ári þar sem þau skyldunámskeið sem metin verða eru kennd á haustmisseri á 2. og 3. námsári. Nemendum stendur þó til boða að fara í skiptinám á vormisseri kjósi þeir það frekar. Nemendur geta að hámarki fengið 30 einingar metnar úr skiptinámi. Metið er 18 ECTS eininga val og að auki eftirfarandi skyldunámskeið: FRG315G Skólafélagsráðgjöf (4e), FRG316G Réttarfélagsráðgjöf (4e) og FRG501G Fjölmenningarfélagsráðgjöf (4e). Í meistaranámi er skiptinám metið hverju sinni. Hagfræðideild: Nemendur geta ekki tekið sambærileg námskeið bæði við HÍ og við gestaskóla. Lagadeild: Skiptinám er einungis í boði fyrir nemendur á meistarastigi. Nemum býðst að taka eitt misseri (30 ECTS um haust eða vor) við erlendan háskóla. Nemendur verða að hafa lokið BA-prófi í lögfræði áður en skiptinám hefst. Nánari upplýsingar Nemendum í LL.M námi í auðlindarétti og alþjóðlegum umhverfisrétti stendur ekki til boða að fara í skiptinám þar sem námið samanstendur aðeins af skyldunámskeiðum. Samkvæmt reglum deildarinnar (reglur um skiptinám, mat á utandeildarnámi og M-námskeið) fæst námskeið ekki metið ef boðið er upp á sambærilegt námskeið í Lagadeild. Það er því ekki hægt að fá námskeið metið í skiptinámi í stað námskeiða í LL.M námi. Stjórnmálafræðideild: Nemendur í stjórnmálafræði til 120 eininga geta ekki farið í skiptinám nema í gegnum aukagrein ef heimild fyrir því fæst hjá deild. Tungumálanámskeið fást ekki metin í skiptinámi. Viðskiptafræðideild: Nemendur geta ekki tekið sambærileg námskeið bæði við HÍ og við gestaskóla. Nemendur í 90 eininga meistaranámi geta að hámarki fengið 30 einingar metnar úr skiptinámi en nemendur í 120 eininga meistaranámi geta að hámarki fengið 45 einingar metnar úr skiptinámi. Nemendum í grunnnámi sem hyggja á skiptinám er bent á kjörsviðið Almenn viðskiptafræði. Heilbrigðisvísindasvið Hjúkrunar- og ljósmóðurfræðideild: Nemendur í hjúkrunarfræði geta ekki tekið námskeið við erlenda samstarfsskóla í skiptinámi. Aðeins er hægt að fara erlendis í klínískt nám í eina til tvær vikur. Lyfjafræðideild: Öll námskeið sem kennd eru í lyfjafræði (BSc og MSc) í Lyfjafræðideild eru skyldunámskeið. Nemendur verða því að finna námskeið í samstarfsskólum sem eru sambærileg og það getur reynst miserfitt. Lyfjafræðideild hvetur nemendur sem hyggja á skiptinám til að leita til kennsluráðs deildarinnar. Nemendur þurfa að vinna umsóknir í samráði við kennsluráð og eftir aðstæðum geta þeir fengið heimild til að fara í skiptinám án þess að fá námskeið metin eða eingöngu þau námskeið sem kennsluráð hefur samþykkt. Læknadeild: Öll námskeið sem kennd eru í læknisfræði í Læknadeild eru skyldunámskeið því er oft erfitt að finna námskeið í samstarfsskólum sem eru sambærileg. Flestir nemendur fara þá leið að komast í samstarf erlendis og vinna 3. árs rannsóknaverkefnið á vormisseri 3. árs, eða á valtímabili á vormisseri 6. árs. Í boði er að sækja um Erasmus+ starfsþjálfunarstyrk til að vinna rannsóknarverkefni í lágmark tvo mánuði. Námsbraut í sjúkraþjálfun: Algengast er að nemendur fari utan í starfsþjálfun (klínískt nám) frekar en að sækja námskeið enda oft mikill munur á skipulagi námskeiða milli landa. Því er einungis hægt að taka klínískt nám á meistarastigi, en hafi nemandi hug á að fara í skiptinám á BS stigi, er mælt með því að viðkomandi setji sig í samband við skrifstofu námsbrautar og afli sér upplýsinga um þau námskeið (námskeiðslýsingu/hæfniviðmið) sem verða í boði í skiptináminu. Matvæla- og næringarfræðideild: Engin sértök skilyrði en nemendur sem hafa áhuga á skiptinámi skulu hafa náið samráð við deildina. Sálfræðideild: Einfaldast er fyrir nemendur að fara í eitt misseri og taka valnámskeið í skiptináminu. Ef nemendur vilja fara í heilt ár verða þeir að finna námskeið í gestaskólanum sem eru sambærileg námskeiðunum sem kennd eru í HÍ. Nemendur geta rætt við deildina um hvort námskeið séu sambærileg. Tannlæknadeild: Algengast er að 5. árs nemar fari í námsdvöl erlendis þar sem það hentar best skipulagi námsins. Hugvísindasvið Íslensku- og menningardeild Almenn málvísindi Nemendur í námsleiðinni geta aðeins farið skiptinám í eitt misseri. Íslenska sem annað mál Námsleiðin Íslenska sem annað mál heimilar ekki misserisdvalir í skiptinámi. Nemendur sem lokið hafa 60ECTS í grunnnámi (BA-gráðu) geta sótt um að fara í styttri skiptinámsdvöl (5-30 daga). Nemendur þurfa að ráðfæra sig við formann námsbrautar um val á námskeiði áður en sótt er um skiptinám í gegnum umsóknargátt í Uglu (innri vef). Ritlist Nemandi í MA-námi í ritlist getur sótt um að verða skiptinemi við erlendan háskóla í eitt misseri. Nemandi getur ekki farið í skiptinám á fyrsta námsmisseri. Íslenska Grunnnám Nemandi sem tekur íslensku til 180 eininga getur sótt um að verða skiptinemi við erlendan háskóla í eitt misseri. Nemandi velur námskeið sem svara til 30 ECTS eininga en það er það hámark sem meta má inn í BA-nám í íslensku úr öðru námi. Nemendur sem hyggjast sækja um að komast í skiptinám erlendis skulu leita ráða hjá námsbrautarformanni þegar þeir velja háskóla og námskeið. Meistaranám Nemandi í MA-námi í íslenskum bókmenntum, íslenskri málfræði eða íslenskum fræðum getur sótt um að verða skiptinemi við erlendan háskóla í eitt misseri. Nemandi velur námskeið sem svara til 30 ECTS eininga, en það er það hámark sem meta má inn í MA-nám í þessum greinum úr öðru námi. Máltækni Nemandi í MA-námi í máltækni getur tekið sérhæfð máltækninámskeið við erlendan háskóla. Um skiptinám erlendis ætti að ráðfæra sig við umsjónarkennara máltækninámsins, Anton Karl Ingason. Nemendur sem hyggjast sækja um að komast í skiptinám erlendis skulu leita ráða hjá námsbrautarformanni þegar þeir velja háskóla og námskeið. Nemendur sem byrja í framhaldsnámi á meistarastigi og vilja fara í skiptinám strax á fyrsta misseri þurfa að ráðfæra sig við námsbrautarformann. ---- Mála- og menningardeild Japanskt mál og menning Nemendur þurfa að hafa lokið tveimur árum (fjórum misserum) af náminu áður en þeir geta farið í skiptinám. Kínversk fræði Nemendur sem taka BA í kínverskum fræðum til 180 eininga þurfa að hafa lokið tveimur árum (fjórum misserum) af náminu áður en þeir geta farið í skiptinám og geta dvalið í tvö misseri. Nemendur sem taka BA í kínverskum fræðum til 120 eininga þurfa að hafa lokið einu og hálfu ári (þremur misserum) af náminu áður en þeir geta farið í skiptinám og geta dvalið í eitt misseri. Menntavísindasvið Nemendur á meistarastigi þurfa að jafnaði að hafa lokið 30e á námsleið til að geta farið í skiptinám. Nemendur í fimm ára samfelldu námi við Menntavísindasvið eru undanskildir þessari reglu. Verkfræði- og náttúruvísindasvið Nemendur þurfa að hafa lokið skyldunámskeiðum 1. árs í grunnnámi og meðaleinkunn má ekki vera lægri en 6,0. facebooklinkedintwitter
