Námsvalshjól

Námsvalshjólinu er ætlað að styðja nemendur við val á námi.

Flokkun á námsleiðum gerir nemendum kleift að kynna sér nám út frá því viðfangsefni sem höfðar til áhugasviðs þeirra og val á námi verður um leið markvissara.

Auk þess er ætlunin með hjólinu að draga úr brottfalli og tilfærslu nemenda milli námsleiða eftir að nám er hafið. Finna má allar námsleiðir háskólans í grunnnámi og meistaranámi í hjólinu.

Námsvalshjólið einfaldar nemendum að finna námsleiðir sem mögulega tengjast þeim brautum sem þeir hafa valið sér í framhaldsskóla.

Hjólið er hannað með þarfir nemenda í forgrunni. Með þróun þess verða tengsl á milli námsleiða sýnilegri, bæði innan fræðasviða Háskóla Íslands og þvert á sviðin. Nemendur fá því betri heildarsýn á námsframboð skólans og þá ótal möguleika sem þeim standa til boða í framtíðinni.

Hjólið hefur verið þróað til að treysta að nemendur finni þær leiðir þar sem þeir njóta sín best og að menntun þeirra gagnist þar með sem mest íslensku samfélagi.

Námsleiðir eru skilgreindar í 10 flokka út frá viðfangsefnum:

• Efnahagur, lög og rekstur
• Fjölmiðlar, upplýsingatækni og miðlun
• Heilsa, líkami og líðan
• Kennsla, siðfræði og mannleg hegðun
• Lífríki, umhverfi og auðlindir
• Líftækni og lyf
• Saga, menning, listir og trú
• Samfélag og stjórnmál
• Tungumál og málvísindi
• Verkfræði, raunvísindi, tækni og tölur

Námsvalshjólið nýtist jafnframt í náms- og starfsráðgjöf, bæði í Háskóla Íslands og í grunn- og framhaldsskólum.

Námsvalshjólið er fyrsta sinnar tegundar hér á landi en svipuð verkfæri hafa verið notuð með góðum árangri erlendis. Hjólið á vef Háskóla Íslands byggist á fyrirmynd frá Kaupmannahafnarháskóla en hefur verið þróað og aðlagað námsframboði og kennslu í Háskóla Íslands. Auk þess styðst það við greiningu og flokkun sem unnin var innan atvinnulífsins. Við þróun þess var bæði haft samráð við fræðimenn í náms- og starfsráðgjöf innan Háskólans og fulltrúa frá Fræðslumiðstöð atvinnulífsins.