Um það bil 11% nemenda við Háskóla Íslands eru með samninga um sértæk úrræði í námi. Kennari þarf því að reikna með að í öllum nemendahópum séu einhverjir einstaklingar sem eru með samninga um úrræði í námi og/eða prófum.
Óski nemandi eftir sértækum úrræðum í námi þarf hann að hafa samband við Nemendaráðgjöf HÍ, afhenda tilskilin gögn frá sérfræðingi og ganga frá samkomulagi (samningi) um úrræði. Nemendur sækja um úrræði í gegnum Uglu. Ganga þarf frá slíkum samningi fyrir 1. október til að fá úrræði í prófum á haustmisseri og fyrir 1. mars til að fá úrræði í prófum á vormisseri.
Athugið að NHÍ veitir ekki úrræði í námi og/eða prófum vegna erlends móðurmáls. Nemendur með erlent móðurmál þurfa að leita til kennara/deilda vegna úrræða í námi og/eða prófum.
Samningur um úrræði getur verið tímabundinn (til eins misseris eða eins skólaárs) eða ótímabundinn (gildir á meðan viðkomandi einstaklingur stundar samfellt nám við skólann).
Próf á vegum Prófaskrifstofu:
NHÍ tryggir úrræði í prófum sem eru á vegum prófstjórnar í samvinnu við prófaskrifstofu. Einstaka úrræði í prófum eru unnin í samvinnu NHÍ og kennara/deildar.
Próf á vegum kennara:
Athugið að ef kennari heldur hlutapróf eða heimapróf á eigin vegum er það í höndum deilda og kennara að tryggja umsamin úrræði. Kennari getur óskað eftir að sjá samning vegna úrræða í hlutaprófum, heimaprófum eða öðrum prófum sem eru á vegum kennara/deildar. NHÍ er kennurum innan handar varðandi ráðgjöf við veitingu sértækra úrræða ef þess er óskað.
Í samningi kemur fram hvaða úrræði það eru sem nemandi þarfnast. Sum úrræði kalla alltaf á samþykki kennara/deildar. Úrræði sem kalla á samþykki kennara og/eða samvinnu við hann eru t.d.:
- Undanþága frá mætingarskyldu
- Sveigjanleiki í verkefnaskilum
- Hópverkefni breytt í einstaklingsverkefni
- Undanþága frá munnlegum verkefnaskilum
- Myndataka af töflu/skjá
- Hljóðritun fyrirlestra
Breytt prófform:
Ef ljóst er að fötlun eða veikindi gera það að verkum að nemanda er ókleift að þreyta próf með hefðbundnum hætti má, með góðum fyrirvara, óska eftir breyttu prófformi hjá kennara og deild. Úrræðið er afar fátítt og fyrir því þurfa að vera skýrar og vel rökstuddar ástæður.
NHÍ býður kennurum og öðru starfsfólki HÍ upp á stutta kynningarfundi um veitingu sértækra úrræða í námi sé þess óskað.
Ráðgjafarnir Ástríður Margrét Eymundsdóttir, Hrafnhildur V. Kjartansdóttir og María Ósk Þorvarðardóttir halda utan um málefni nemenda með sértæk úrræði í námi sem og Helga Geirsdóttir og Inga Birna Albertsdóttir verkefnisstjórar.
Netfang úrræðateymis er urraedi@hi.is
Reglur um sértæk úrræði í námi við Háskóla Íslands.