Erasmus+ dvöl innan Evrópu

Kennaraskipti/gestakennsla þarf að vera við menntastofnun í Evrópu. Kennslan og vinna tengd henni skal vera að lágmarki 8 stundir í ferð í 2-14 daga (með ferðadögum). Kennarar geta að sjálfsögðu einnig sótt um styrki í starfsþjálfun eða sameinað gestakennslu og starfsþjálfun í sömu ferð. Ferðir á ráðstefnur og tungumálanámskeið eru ekki styrktar. Ef helgi brýtur upp dvölina, er ekki sjálfgefið að helgardagarnir séu styrktir. Það þarf að vera ljóst að nauðsynlegt sé að dvölin nái yfir helgi. Erasmus+ samstarfssamningur (Erasmus+ institutional agreement) milli Háskóla Íslands og gestaskóla þarf að vera fyrir hendi ef um gestakennslu er að ræða.

Byrja skal á því að fylla út kennslu- eða starfsþjálfunaráætlun (mobility agreement) eftir því sem við á. Fá undirskriftir á hana og síðan er hún hengd við rafrænu umsóknina. Fyrir umsóknarfrestinn er nóg að umsækjandi og næsti yfirmaður skrifi undir, undirskrift móttökuaðila má koma síðar. Til hliðsjónar skal hafa "Gæðaskala sem er notaður við mat umsókna". Sjá að neðan.

Mikil áhersla er lögð á gæði umsókna í Erasmus+ áætluninni og verða kennaraskiptin eða starfsþjálfunin að hafa skýra tengingu við markmið og starf deildar/einingar. Yfirmaður umsækjanda skrifar undir kennslu- eða starfsþjálfunaráætlun (mobility agreement) og er með því að samþykkja að dvölin sé hluti af starfi og stefnu deildar eða námsbrautar. Lýsing á tilgangi, innihaldi og dagskrá dvalar þarf að vera nákvæm og vel unnin.

Rafræn umsókn   
Gæðaskali sem er notaður við mat umsókna
Eyðublað fyrir kennsluáætlun
Eyðublað fyrir starfsþjálfunaráætlun
Styrkupphæðir 2024 
Styrkupphæðir 2023  
Viðbótarstyrkur vegna fötlunar

Kennarar og stjórnsýslufólk geta sótt um styrki til að fara í starfsþjálfun í þátttökulöndum Erasmus+ s.s. með þátttöku í fagtengdum námskeiðum eða vinnustofum, starfskynningum (job shadowing) eða skipulögðum heimsóknum til samstarfsskóla. Skipulögð dagskrá þarf að vera í minnst tvo daga en hægt er að styrkja ferðadaga að auki. Að hámarki eru 14 dagar styrktir. Ef helgi brýtur upp dvölina, er ekki sjálfgefið að helgardagarnir séu styrktir. Það þarf að vera ljóst að nauðsynlegt sé að dvölin nái yfir helgi. Ferðir á ráðstefnur og tungumálanámskeið eru ekki styrktar.

Vakin er athygli á að um er að ræða styrki til einstaklinga en ekki til hópa, þótt möguleiki sé að styrkja fleiri en einn umsækjanda í sömu ferð.

Byrja skal á því að fylla út starfsþjálfunaráætlun (mobility agreement). Fá undirskriftir á hana og síðan er hún hengd við rafrænu umsóknina. Fyrir umsóknarfrestinn er nóg að umsækjandi og næsti yfirmaður skrifi undir, undirskrift móttökuaðila má koma síðar. Til hliðsjónar skal hafa "Gæðaskala sem er notaður við mat umsókna". Sjá að neðan.

Mikil áhersla er lögð á gæði umsókna í Erasmus+ áætluninni og verður starfsþjálfunin að hafa skýra tengingu við markmið og starf deildar/einingar. Yfirmaður umsækjanda skrifar undir starfsþjálfunaráætlun (mobility agreement) og er með því að samþykkja að dvölin sé hluti af starfi og stefnu deildar/einingar. Lýsing á tilgangi, innihaldi og dagskrá dvalar þarf að vera nákvæm og vel unnin.

Rafræn umsókn 
Gæðaskali sem er notaður við mat umsókna
Eyðublað fyrir starfsþjálfunaráætlun
Styrkupphæðir 2024
Styrkupphæðir 2023
Viðbótarstyrkur vegna fötlunar

Háskólar geta boðið fulltrúum fyrirtækja, stofnana eða félagasamtaka í öðrum þátttökulöndum Erasmus+ að sinna gestakennslu fyrir nemendur í sínum skóla í einn til 12 daga (hámark 14 dagar styrktir með ferðadögum). Styrkurinn er greiddur til viðkomandi deildar/námsbrautar eða einingar innan Háskólans, sem síðan greiðir gestakennaranum.

Byrja skal á því að fylla út kennsluáætlunina, fá undirskriftir á hana og síðan er hún hengd við rafrænu umsóknina. Fyrir umsóknarfrestinn er nóg að umsækjandi í deild HÍ og næsti yfirmaður skrifi undir, undirskrift gestakennarans má koma síðar.

Mikil áhersla er lögð á gæði umsókna í Erasmus+ áætluninni og þarf gestakennslan að hafa skýra tengingu við markmið og starf deildar/einingar. Gestakennslan skal vera fyrir stúdenta.

Rafræn umsókn
Kennsluáætlun fyrir "Incoming staff from enterprise to teach"
Styrkupphæðir 2024
Styrkupphæðir 2023
Viðbótarstyrkur vegna fötlunar

Styrkhafi sendir inn afrit af flugfarseðli. Bent er á að ferðastyrkur er föst upphæð sem fer eftir áfangastað og því getur verið mikilvægt að panta flug (og lest) með góðum fyrirvara. Áður en styrkur er endanlega reiknaður út, skal styrkhafi senda inn fullundirritaða kennslu- eða starfsþjálfunaráætlun eftir því sem við á. Ef einhverjar breytingar hafa orðið á fyrirhugaðri dvöl, frá því að umsókn var send inn, gæti verið nauðsynlegt að útbúa nýja áætlun og fá undirskrift á hana. Koma þarf skýrt fram hversu margir dagar (án ferðadaga) eru fyrirhugaðir við gestastofnun og einhver virkni koma fram alla dvalardagana. Undirrituð áætlun má vera skönnuð. Dagpeningar eru reiknaðir út frá fjölda daga við gestastofnun + einn til tveir ferðadagar, eftir því sem við á.

Þegar fullundirrituð kennslu eða starfþjálfunaráætlun og afrit af flugfarseðli hefur verið sent til Alþjóðasviðs, fær styrkhafi sendan Erasmus+ styrksamning í tölvupósti. Prenta skal hann út í tveimur eintökum, undirrita bæði eintökin (frumrit) og koma þeim til Alþjóðasviðs, t.d. í innanhússpósti. Erasmus+ styrksamningurinn á að vera undirritaður fyrir brottför. Styrkhafi fær síðan annað eintakið af samningnum eftir að alþjóðafulltrúi á Alþjóðasviði hefur skrifað undir hann. Geymið samninginn, gott að hafa hann við hendina þegar lokaskýrsla er gerð og einnig þegar styrkurinn er talinn fram til skatts.

Þegar þessu er lokið getur greiðsla styrksins farið fram. Ef öll gögn eru móttekin ætti að vera hægt að greiða styrkinn út allt að tveimur mánuðum fyrir brottför. Hafa skal í huga að það getur tekið tíma að greiða út styrk eftir að Alþjóðasvið hefur móttekið undirritaðan samninginn. Styrkurinn er allur greiddur út í einu lagi.

Styrkhafi tekur með sér eyðublaðið staðfesting á dvöl til undirritunar hjá gestastofnun og skilar undirrituðu frumriti að dvöl lokinni.

Eftir dvöl fær styrkhafi sent lokaskýrsluform í tölvupósti sem skila skal inn ekki seinna en viku eftir heimkomu.

Styrkurinn er framtalsskyldur en telja skal fram kostnað á móti og er þá ekki greiddur skattur af styrknum. Geyma skal allar kvittanir.