Farsæld barna

Félagsvísindasvið

Örnám á framhaldsstigi – 30 einingar

Nám um farsæld barna er sett á stofn til að styðja við innleiðingu nýrrar löggjafar um samþætta þjónustu við börn. Markmið námsleiðarinnar er að auka sérhæfða þekkingu á málefnum barna og þjónustu við þau í anda farsældarlaga. Áhersla er á þverfaglegt samstarf og teymisvinnu, mikilvægi snemmtækrar þjónustu og börn sem þátttakendur. Fjarnám.

Sækja um nám

Show Um hvað snýst námið?

Markmið námsleiðarinnar er að koma til móts við þörf fyrir sérhæfða þekkingu og færni í samræmi við lög um samþættingu þjónustu í þágu farsældar barna sem tóku gildi 1. janúar 2022.

Náminu er ætlað að styðja við innleiðingu hinnar nýju löggjafar með því að veita þekkingu á barnamiðaðri nálgun, samþættingu þjónustu, hlutverki tengiliða og málstjóra og mælingum á árangri. Þá verður lögð áhersla á færni í teymisvinnu og þverfaglegri samvinnu auk áherslu á mikilvægi fyrsta stigs þjónustu við börn.

Námið er ætlað öllum þeim sem hafa lokið BA/BED/BS prófi og starfa með börnum í heilbrigðis-, skóla- og velferðarþjónustu eða á öðrum vettvangi.

Námsleiðin er grundvölluð á samstarfssamningi Mennta- og barnamálaráðuneytis og Háskóla Íslands um stuðning HÍ við innleiðingu á hinni nýju löggjöf.

Uppbygging náms

Námið er eins árs 30 eininga fjarnám í rauntíma. Um er að ræða nám með starfi.

Námið samanstendur af þremur 10 eininga námskeiðum og er eitt námskeið kennt í einu:

Börn og farsæld: Réttindi barna og þátttaka þeirra
- Kennt að hausti
Samþætt þjónusta við börn: Löggjöf um farsæld
- Kennt fram yfir áramót
Tengiliðir og þverfaglegt samstarf: Nýtt vinnulag í þágu barna
- Kennt fram að vori

Fyrirkomulag kennslu

Fyrirlestrar og umræðutímar verða eingöngu í fjarnámi í rauntíma (ekki upptökur) einu sinni í viku.
Mætingarskylda er í tvær tveggja daga staðlotur á hvoru misseri.
Námið hefst með tveggja daga staðlotu á haustmisseri.

Umsjónarkennarar

Ragnheiður Hergeirsdóttir lektor (ragher@hi.is)
Herdís Steingrímsdóttir lektor (herdisst@hi.is)

Umsjónarkennararar veita nánari upplýsingar. Í námsnefnd sitja einnig fulltrúar Barna- og fjölskyldustofu.

Annað

Hægt er að fá námið metið inn í MA nám í félagsráðgjöf að uppfylltum inntökuskilyrðum.

Sjá MA nám í félagsráðgjöf, rannsóknarnám

Skipulag náms

1. ár

Samþætt þjónusta við börn: Löggjöf um farsæld (FRG240F)

Námskeiðið veitir grundvallarþekkingu á löggjöf sem varðar þjónustu við börn með sérstakri áherslu á lög um samþætta þjónustu við börn í þágu farsældar barna, Barnasáttmála SÞ og alþjóðlegar skuldbindingar á sviði barnaréttar. Þá verður fjallað um hvernig löggjöfin leggur áherslu á fyrsta stigs þjónustu við börn og hvernig koma megi í veg fyrir aðstæður sem ógna farsæld barna. Í fyrri hluta námskeiðsins er einblínt á að nemendur öðlist þekkingu og skilning á löggjöfinni en í seinni hluta námskeiðs er lögð áhersla á beitingu þekkingar og vinnu með raunhæf dæmi af vettvangi (tilvik). Einnig verður fjallað um félagslegar fjárfestingar, rannsóknir og mælingar sem snúa að farsæld barna og hvernig meta megi hvort markmiðum löggjafar er náð, m.a. með áherslu á aðferðir kostnaðar- og nytjagreininga.

Nánar um námskeiðið

Börn og farsæld: Réttindi barna og þátttaka þeirra (FRG128F)

Í námskeiðinu er áhersla á að veita grundvallarþekkingu á bernskufræðum og í því samhengi rætt um barnamiðaða nálgun, með sérstakri áherslu á börn í viðkvæmri stöðu. Fjallað verður um hagsmuni barna, verndandi þætti og hættur sem ógna farsæld barna. Áhersla er lögð á að fjalla um hvernig fyrsta stigs þjónusta við börn skapar tækifæri til að grípa fyrr inn í aðstæður og koma í veg fyrir aðstæður sem ógna farsæld barna. Í námskeiðinu er fjallað um ýmis álitamál og áskoranir sem geta komið upp í vinnu með börnum. Hagnýt dæmi verða rædd og nýtt til að beita gagnreyndu vinnulagi við ákvarðanatöku auk þess sem farið verður yfir hvernig hægt er að beita ígrundun í starfi.

Nánar um námskeiðið

Tengiliðir og þverfaglegt samstarf: Nýtt vinnulag í þágu barna (FRG238F)

Í námskeiðinu er lögð áhersla á grundvallarþekkingu á samvinnu og þverfaglegri teymisvinnu innan og utan stofnana. Fjallað verður um hvað felst í samþættingu þjónustu og hlutverki tengiliða og málstjóra í því samhengi, auk þess sem áhersla verður á að kynna hagnýtar aðferðir í þágu farsældar barna. Nemendur fá tækifæri til að rýna og greina styrkleika sína og hindranir á þessu sviði. Auk þess er lögð áhersla á að nemendur læri að tileinka sér og nýta handleiðslu og endurgjöf til faglegs þroska í samvinnu og teymisvinnu. Þá verður fjallað um ýmsar áskoranir við samþættingu þjónustu í þágu farsældar barna og um gagnreyndar aðferðir og nálgun í starfi með börnum með áherslu á snemmtæka þjónustu.

Nánar um námskeiðið

Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá