Stefnumót við sprotafyrirtæki Háskóla Íslands

Fulltrúar sprotafyrirtækjanna Heilsugreind, Núnatrix, Risk og Taramar, sem öll hafa verið stofnuð á grunni rannsókna við Háskóla Íslands, fjalla um áskoranir í starfi og framtíðarsýn í stuttum erindum í Hátíðarsal skólans fimmtudaginn 19. maí kl. 12-13. Viðburðurinn er opinn öllum auk þess sem honum verður streymt á vef og samfélagsmiðlum Háskóla Íslands. Viðburðurinn er hluti af Nýsköpunarvikunni dagana 16.-20. maí.

Heilsugreind ehf. var stofnað 2017 og markmið þess er að hanna kerfi sem notar viðskiptagreind til að aðstoða við ákvarðanir í rekstri heilbrigðiskerfa. Sem dæmi um verkefni sem fyrirtækið hefur komið að er betri röðun skurðaðgerða og betra yfirlit um meðferð brjóstakrabbameinssjúklinga. Í erindinu mun Rögnvaldur Sæmundsson, framkvæmdastjóri fyrirtækisins, fara yfir sögu og framtíðarsýn félagsins.

NúnaTrix ehf. er nýsköpunarfyrirtæki sem sérhæfir sig í gerð kennslutölvuleikja fyrir heilbrigðisgeirann. Slíkir leikir eru í vaxandi mæli þróaðir til að nota í sjúklingafræðslu, annarri meðferð sjúklinga og kennslu heilbrigðisstétta. Í erindinu mun Brynja Ingadóttir, framkvæmdastjóri félagsins, fjalla um tilurð fyrirtækisins, verkefni þess og rannsóknir fram til þessa og framtíðarsýn.

Risk ehf. var stofnað árið 2009. Það hefur smíðað hugbúnað í formi áhættureiknivélar sem metur sjálfvirkt áhættu einstaklinga með sykursýki á augnsjúkdómum og sjónskerðingu. Sigurbjörg Ásta Jónsdóttir, framkvæmdastjóri Risk, mun í erindi sínu ræða vegferð fyrirtækisins, ávinning og áskoranir við að innleiða stafrænar heilbrigðislausnir og framtíðarhorfur

Taramar ehf. var stofnað árið 2010 og sérhæfir sig í þróun og framleiðslu á lífrænum og hreinum húðvörum sem hafa þann eiginleika að draga úr sjáanlegum áhrifum öldrunar. Í erindinu mun Guðrún Marteinsdóttir prófessor fjalla um uppruna Taramar og mikilvægi vísindalegra aðferða við að þróa ný náttúruleg efni sem styrkja og bæta húðina.