Meistarafyrirlestur í jarðeðisfræði - Melissa de Freitas

Meistaranemi: Melissa de Freitas

Heiti verkefnis: Reiknilíkangerð af jarðhitakerfum, með landsig notað til skorðunar: Reiknilíkan af jarðhitakerfinu í Svartsengi.

___________________________________________

Deild: Jarðvísindadeild

Leiðbeinendur: Guðni Axelsson, sviðsstjóri kennslu og þróunar hjá ISOR og Páll Einarsson, prófessor emeritus við Jarðvísindadeild Háskóla Íslands

Prófdómari: Lárus Þorvaldsson verkfræðingur hjá Verkfræðistofunni Vatnaskil

Ágrip

Jarðhitakerfið í Svartsengi og Eldvörpum er háhitakerfi og staðsett á skáreksbelti Reykjanesskagans, sem er hluti flekaskilanna milli Norður-Ameríkuflekans og Evrasíuflekans. Mælingar á tímabilinu 1975-2015 sýna að svæði umhverfis flekaskilin sígur um 7-14 mm á ári og er hámark sigsins á vinnslusvæði jarðhitans við Svartsengi. Margs konar rannsóknir hafa verið gerðar til að bera kennsl á og einangra einstaka orsakaþætti sigsins. Niðurstöður nýlegra landmælinga hafa bent til þess að flekaskilin á Reykjanesskaganum sígi um 6 mm á ári af náttúrulegum orsökum, þ.e. vegna flekareksins. Í þessari ritgerð verður leitast við að meta áhrif jarðhitavinnslunnar á sigið með því að nota TOUGH2 forritið til að gera reiknilíkan af jarðhitakerfinu. Sigið er reiknað út frá massa jarðhitavökvans sem tekinn er úr kerfinu á ári og magni affallsvökva sem dælt er niður í kerfið árlega. Reiknað var með einvíðu siglíkani sem nýlega var bætt við forritapakkann iTOUGH2.  Reikningarnir leiða í ljós að há vökvaleiðni, niðurdráttur og breytingar á varmanámi og niðurdælingu skipta miklu máli þegar áhrif jarðhitavinnslunar á heildarsigið eru metin. Líkanið bendir til að sighraða upp á 3-4 mm á ári megi skýra með jarðhitavinnslunni. Þessi gildi að viðbættu sigi vegna flekahreyfinga eru í góðu samræmi við mælt sig umhverfis Svartsengi. Reiknilíkön virðast þannig vera þýðingarmikil tól til að meta sighraða vegna vinnslu jarðhita við Svartsengi og Eldvörp í framtíðinni.