STEM-greinar

Ég fór að læra tölvunarfræði vegna þess að mér finnst það góð leið til að nýta stærðfræðina á hagnýtan hátt, forritunin getur verið skapandi samhliða því að nýta rökhugsun og er klárlega það sem mér finnst skemmtilegast við námið. Möguleikarnir eftir nám eru einnig mjög fjölbreytilegir, hvort sem maður vill starfa hjá litlu sprotafyrirtæki eða vinna hjá stóru tæknirisunum og allt þar á milli.  Félagslífið er líka frábært, „Nördar“ (Nemendafélagið Nörd) hafa góða aðstöðu til að læra saman og mikil heild sem myndast hjá þeim sem eru duglegir að mæta, sama hvort það sé í skólanum eða í vísó á föstudögum. 

Mér finnst námið í umhverfis- og byggingarverkfræði fjölbreytt, áhugavert og skemmtilegt. Kennararnir eru lifandi og skemmtilegir ásamt því að vera miklir fagmenn sem hafa mikinn áhuga og vilja til að deila þekkingu og reynslu.
Námið er mjög hagnýtt og snemma í náminu fær maður að kynnast því hvað umhverfis- og byggingarverkfræðingar fást við daglega sem gefur manni góða innsýn í möguleika í framtíðinni.  Félagslífið er mjög gott og alltaf nóg af viðburðum og vísindaferðum sem toppa námið enn frekar.