Guðbjört Guðjónsdóttir, meistaranemi í mannfræði við Félags- og mannvísindadeild
Guðbjört Guðjónsdóttir er að leggja lokahönd á MA-ritgerð sína í mannfræði en hún fjallar um reynslu kvenna af erlendum uppruna sem vinna á hótelum á Íslandi.
Hverjar eru helstu niðurstöðurnar?
Ég komst m.a. að því að konur af erlendum uppruna eru í slæmri stöðu varðandi störf og kjör á Íslandi. Þær virðast vera hálf-gleymdur hópur, bæði innan verkalýðsfélaganna og femínískra hópa. Mín tilfinning er sú að verkalýðsfélögin hafi unnið ágætisstarf varðandi mál innflytjenda en að þau hafi aðallega einbeitt sér að erlendum körlum og helst þeim sem vinna í byggingarvinnu. Oft gleymist að fjalla um málefni innflytjenda og kynjabreytu á sama tíma, bæði um málefni erlendra kvenna og stundum einnig karla sem hafa fyllt lægst launuðu (kvenna)störfin.
Guðbjört Guðjónsdóttir
Ég komst m.a. að því að konur af erlendum uppruna eru í slæmri stöðu varðandi störf og kjör á Íslandi. Þær virðast vera hálf-gleymdur hópur, bæði innan verkalýðsfélaganna og femínískra hópa.
Hvers vegna er störfum innflytjendakvenna sýndur minni áhugi en -karla?
Ég er að velta því fyrir mér hvort þetta geti stafað af þeirri gömlu hugmynd að það sé mikilvægt að karlmenn fái hærri laun fyrir störf sín en konur þar sem þeir eru álitnir vera fyrirvinnur heimilanna, og þess vegna sé enn meiri áhersla lögð á hefðbundin karlastörf en kvennastörf hjá verkalýðsfélögunum. Margar kvennanna áttu eiginmenn sem unnu í byggingageiranum og þeir fengu mun hærri laun en konurnar þó að þeir væru ekki endilega menntaðir iðnaðarmenn. Í raun eru þessi störf alls ekki ósambærileg, að vinna almenn störf í byggingarvinnu eða að vinna við þrif á hótelum. Í báðum störfunum þarf starfsmaðurinn að tileinka sér ákveðna tækni til þess að sinna starfinu og störfin eru líkamlega erfið. Það er því ekki sjálfgefið að þrif séu verr launuð en byggingarvinna.
Leiðbeinandi: Kristín Loftsdóttir, prófessor við Félags- og mannvísindadeild.