Svandís Hlín Karlsdóttir, MS frá Iðnaðarverkfræði-, vélaverkfræði- og tölvunarfræðideild
Íslendingar eiga marga möguleika á að nýta orkuauðlindir sínar. Mikið hefur verið rætt um möguleikann á að flytja raforku héðan um sæstreng inn á erlend raforkunet og til sölu á mörkuðum í Evrópu. „Þetta hefur lítt verið rannsakað á Íslandi og mér þótti því áhugavert að athuga hvort Ísland gæti tengst slíku raforkuneti. Ég vildi kanna hvort staðsetningin, hafið eða veðrið kæmi í veg fyrir þetta tæknilega og hvort strengurinn uppfyllti kröfur um orkuöryggi,“ segir Svandís Hlín Karlsdóttir um meistaraverkefnið sitt.
„Verkefnið fjallar um að afla reynslu frá öðrum löndum varðandi flutning á rafmagni um sæstreng. Sú reynsla er yfirfærð á Ísland til að meta hvort tæknin henti fyrir íslenskar aðstæður. Einnig vildi ég meta hversu sæstrengur frá Íslandi til meginlands Evrópu yrði áreiðanlegur.“
Svandís Hlín Karlsdóttir
„Verkefnið fjallar um að afla reynslu frá öðrum löndum varðandi flutning á rafmagni um sæstreng. Sú reynsla er yfirfærð á Ísland til að meta hvort tæknin henti fyrir íslenskar aðstæður. Einnig vildi ég meta hversu sæstrengur frá Íslandi til meginlands Evrópu yrði áreiðanlegur.“
Kveikjan að verkefninu var annað verkefni sem Svandís Hlín vann sem skiptinemi við KTH-tækniháskólann í Stokkhólmi á þróun á endurnýjanlegum orkugjafa til raforkuframleiðslu í Evrópu. „Lönd á meginlandinu eru að tengjast saman í stærri raforkunet til að nýta slíka orkugjafa betur, auka orkuöryggi sitt og minnka umhverfisáhrif.“
Út frá samantekt sinni á rekstri sæstrengja mat Svandís hversu slíkur sæstrengur frá Íslandi til Bretlands yrði áreiðanlegur. Samkvæmt niðurstöðum hennar er tæknin til staðar til að flytja raforkuna frá Íslandi með háspennujafnstraumskapli inn á markaði í Evrópu og því er þetta fýsilegur kostur til raforkusölu að mati Svandísar.
„Veðurskilyrði í Atlantshafinu, tækni og staðsetning hefur engu að síður mikil áhrif á hversu sæstrengurinn yrði áreiðanlegur. Áreiðanleikinn er metinn að meðaltali upp á 74%, sem svarar til að honum slái út í nærri 1.900 klukkustundir á ári miðað við að einn strengur sé í kerfinu.“
Svandís segir að niðurstöðurnar veiti mikilvægar upplýsingar um ákveðinn hluta af þessu stóra og flókna kerfi sem sæstrengsverkefnið er. „Til að auka líftíma og orkuöryggi kerfisins er mikilvægt að gera strenginn sem áreiðanlegastan og rannsaka ítarlega m.a. hafsbotninn og veðurskilyrði í Atlantshafi.“
Leiðbeinendur: Rúnar Unnþórsson lektor og Tómas Philip Rúnarsson prófessor, báðir við Iðnaðarverkfræði-, vélaverkfræði- og tölvunarfræðideild.