Kristín Ágústsdóttir, MS frá Viðskiptafræðideild
„Aukin atvinnuþátttaka kvenna og reynsla þeirra á vinnumarkaði hefur töluvert verið rannsökuð síðastliðna áratugi, sérstaklega hvað innra skipulag fyrirtækja varðar, þ.e. horft hefur verið til stöðuhækkana innan þeirra og af hverju konur komast ekki í æðstu stjórnunarstöður.“ Þetta segir Kristín Ágústsdóttir sem lauk árið 2012 meistaranámi í markaðsfræði og alþjóðaviðskiptum með verkefninu Konur og æðstu stjórnunarstöður – er glerhurðin til staðar á Íslandi?
Í rannsókninni beindi hún sjónum sínum að tilfærslum í störfum á milli fyrirtækja, þ.e. að ytri ráðningum. „Nýlegt hugtak sem litið hefur dagsins ljós er „glerhurðin“. Glerhurðin og hið betur þekkta hugtak „glerþakið“ eru tvær hliðar á sama peningi. Glerhurðin vísar til ráðninga í æðstu stjórnunarstöður á ytri markaði og er myndlíking fyrir hindranir sem konur standa frammi fyrir og þá er átt við að ekki sé eins líklegt að konur séu ráðnar í störfin og karlar.“
Kristín Ágústsdóttir
„Glerhurðin vísar til ráðninga í æðstu stjórnunarstöður á ytri markaði og er myndlíking fyrir hindranir sem konur standa frammi fyrir og þá er átt við að ekki sé eins líklegt að konur séu ráðnar í störfin og karlar.“
Í rannsókn Kristínar voru raungögn um auglýstar æðstu stjórnunarstöður skoðuð, bæði hverjir sóttu um störfin og hverjir voru ráðnir. „Niðurstöðurnar eru þær að konur voru í verulegum minnihluta umsækjenda þegar kom að auglýstum æðstu stjórnunarstöðum, eða 24,6%. Umsækjendahópurinn er því töluvert bundinn við kyn á Íslandi og það rímar við erlendar rannsóknir. Karlar sem fengu starfið sem þeir sóttu um voru 61% umsækjenda en hlutfall kvenna var 39%. Konur höfðu því rúmlega tvisvar sinnum meiri líkur á að fá starfið sem þær sóttu um en karlarnir þegar um ytri ráðningar í æðstu stjórnunarstöður var að ræða og fengu 3,2% kvennanna sem sóttu um starf á móti 1,6% karlanna.“
Kristín segir jafnframt að marktækur munur hafi fundist á stjórnunarstarfsreynslu eftir kynjum í hópi umsækjenda. „Karlkyns umsækjendurnir höfðu að meðaltali 4,9 fleiri ár í stjórnunarstarfsreynslu en konurnar og karlarnir sem fengu störfin voru að meðaltali með 5,69 fleiri ár í stjórnunarstarfsreynslu en konurnar. Ekki fannst marktækur munur á menntun kynjanna, hvorki meðal umsækjenda né þeirra sem fengu störfin. Ótvíræð niðurstaða er að karlarnir voru með meiri stjórnunarstarfsreynslu en konurnar og að konur virðast þurfa meiri menntun en karlar til þess að fá auglýst störf.“
Þrátt fyrir að glerhurðin virðist ekki vera til staðar hér á landi segir Kristín að ummerki glerþaksins finnist á Íslandi þar sem konur eru hér enn í verulegum minnihluta þegar kemur að æðstu stjórnunarstöðum.
Leiðbeinandi: Kári Kristinsson, lektor við Viðskiptafræðideild