Sigrún Alda Magnúsdóttir, MS frá Viðskiptafræðideild
Flestir tengja húmor sjálfsagt við uppistand og brandarakarla og -konur. Það virðist þó sem að húmor geti gegnt mikilvægu hlutverki innan fyrirtækja, þá sérstaklega meðal stjórnenda. Sigrún Alda Magnúsdóttir, MS í mannauðs- stjórnun, vann lokaverkefni með yfirskriftinni „Gerir húmor gagn? Tengsl húmors, starfsánægju og tegundar fyrirtækis“ þar sem hún skoðaði þennan mikilvæga þátt innan fyrirtækja.
„Mig langaði að gera öðruvísi verkefni og einn daginn heyrði ég talað um hlutverk húmors í stjórnun fyrirtækja í útvarpinu,“ segir Sigrún um kveikjuna að verkefninu. Úr varð að hún kannaði húmor í þremur fyrirtækjum á Íslandi, tveimur á almennum markaði og einu ríkisreknu.
Sigrún Alda Magnúsdóttir
„Mig langaði að gera öðruvísi verkefni og einn daginn heyrði ég talað um hlutverk húmors í stjórnun fyrirtækja í útvarpinu,“ segir Sigrún um kveikjuna að verkefninu.
Í rannsókninni var spurningalisti lagður fyrir starfsmenn fyrirtækjanna en listinn mældi starfsánægju, fyrirtækjamenningu og húmor sem stjórntæki. Niðurstöðurnar leiddu í ljós að húmor skipti vissulega miklu máli innan fyrirtækjanna og bæði stjórnendur og starfsfólk töldu húmor vera mikilvægt stjórntæki. Stærstur hluti starfsfólks sagði yfirmann sinn vera vingjarnlegan, hæfan og hafa góðan húmor en allt eru þetta eiginleikar sem góður stjórnandi þarf að hafa til að nota húmor sem stjórntæki á uppbyggilegan og gagnlegan hátt að sögn Sigrúnar.
„Fyrirtæki ættu að skoða að innleiða húmor inn í menningu sína. Hann beinir áhuga að starfsfólki og færir stjórnendur nær starfsfólki sínu,“ segir Sigrún en bætir við að með þessu sé þó ekki átt við að stjórnendur eigi að vera með uppistand alla daga. „Þetta snýst um að taka sig ekki of alvarlega og ekki setja sig á háan hest í augum starfsfólks. Til dæmis er hægt að taka dæmi um eigin mistök úr fortíðinni þegar maður leiðbeinir nýju starfsfólki.“
Sigrún segir að það hafi komið sér mest á óvart að starfsánægja hafi mælst meiri í ríkisrekna fyrirtækinu en hjá almennu fyrirtækjunum. Meiri nánd hefði verið til staðar í fyrrnefnda fyrirtækinu en hinum fyrirtækjunum og almennt góður starfsandi.
Sigrún telur að innleiðing húmors í stjórnunaraðferðir sé mjög jákvæð en mannleg færni stjórnandans skipti miklu máli. „Þetta er ekki eins áþreifanlegt eins og til dæmis frammistöðumat en engu að síður mikilvægt tæki fyrir stjórnendur,“ segir Sigrún að lokum.
Leiðbeinandi: Þórður S. Óskarsson, aðjunkt við Viðskiptafræðideild.