Rannsókn um lífsstíl, hreyfingu og hollustu 7 til 9 ára barna var meginviðfangsefni þáttar sem sýndur var í Sjónvarpinu. Í þættinum var fjallað um niðurstöður rannsóknar í Háskóla Íslands sem gerð var á árunum 2006 til 2008. Rannsóknin sýnir að unnt er að auka hreyfingu og stuðla að hollara mataræði hjá þessum aldurshópi með samstilltu átaki heimila og skóla.
„Rannsóknin er þverfræðilegt samstarfsverkefni vísindamanna og framhaldsnema við Menntavísindasvið og Heilbrigðisvísindasvið HÍ,“ segir Erlingur Jóhannsson, deildarforseti Íþrótta-, tómstunda- og þroskaþjálfadeildar. Hann var verkefnisstjóri en að rannsókninni komu einnig þau Ingvar Sigurgeirsson, varadeildarforseti Kennaradeildar, og Inga Þórsdóttir, deildarforseti Matvæla- og næringarfræðideildar.
Erlingur segir að markmiðið hafi verið að auka heilbrigði barna. „Verkefnið var unnið í samstarfi við hreyfingu barna í íhlutunarskólunum, bæði innan og utan skóla, í samstarfi við kennara og foreldra.
Þetta var gert með því að flétta hreyfingu og leikjum inn í kennslu ýmissa námsgreina og auka íþróttakennslu,“ segir Erlingur. „Þá var leitast við að hafa áhrif á mataræði barnanna til aukinnar hollustu, m.a. með fræðslu og samvinnu við kennara, starfsfólk mötuneyta skólanna og foreldra og var þar fylgt markmiðum Lýðheilsustöðvar,“ segir hann.
Í íþróttahúsi HÍ
„Mælingar í lok tímabilsins leiddu í ljós að mataræði barna í íhlutunarskólunum hafði nálgast markmið Lýðheilsustöðvar mun meira en barna í samanburðarskólunum.“
Erlingur segir að í upphafi hafi verið gerðar ýmsar mælingar á nemendum, á holdafari, þreki, hreyfingu, beinþéttni, mataræði og þáttum sem tengdust lífsstíl þeirra. Mælingarnar hafi verið endurteknar í lok tímabilsins, auk þess sem hreyfimælingar hafi verið gerðar á miðju tímabilinu.
„Mælingar í lok tímabilsins leiddu í ljós að mataræði barna í íhlutunarskólunum hafði nálgast markmið Lýðheilsustöðvar mun meira en barna í samanburðarskólunum,“ segir Erlingur.
„Mikil aukning varð á neyslu barnanna á grænmeti og ávöxtum, fiski og lýsi. Neysla barna í íhlutunarskólunum á grænmeti reyndist t.d. 50% meiri en í samanburðarskólunum. Aukning á hreyfingu varð fyrst og fremst á skólatíma og þá einkum meðal drengja. Þá reyndist þol barna í íhlutunarskólunum tíu prósent meira en í samanburðarskólum.“ Erlingur segir að þrír doktorsnemar og tveir meistaranema hafi einnig tekið þátt í verkefninu. Doktorsnemarnir voru þau Ása Guðrún Kristjánsdóttir, í næringarfræði, Kristján Þór Magnússon, MPH faraldsfræðingur, og Hannes Hrafnkelsson, MD sérfræðingur í heimilislækningum. Meistaranemarnir voru þær Katrín Heiða Jónsdóttir og Erna Héðinsdóttir.