Fyrirlestur í heimspeki: Atli Harðarson

Atli Harðarson, prófessor við Menntavísindasvið Háskóla Íslands, heldur fyrirlestur á vegum Heimspekistofnunar HÍ þann 23. október kl. 15:00-16:30 í stofu 303 í Árnagarði. Fyrirlesturinn nefnist „Sjálft frelsið “ og verður á íslensku. Verið öll velkomin.

Um fyrirlesturinn

Í heimspekilegum skrifum er oft gerður greinarmunur á ólíkum gerðum af frelsi eins og neikvætt frelsi sé eitt, jákvætt frelsi annað og frelsi viljans eða þjóðfrelsi enn annað. Í fyrirlestrinum er sett fram tilgáta um að á bak við margvíslegt tal búi einn merkingarkjarni og umræða um mismunandi gerðir af frelsi bendi á sömu lífsgæðin úr ólíkum áttum.

Tilgátan er að hugsjónir um frelsi snúist um að eigið vit ráði ferðinni í eigin lífi og það sé þungamiðja hugtaksins. Til að útskýra tilgátuna og rökstyðja hana styðst ég við rit eftir Benedict Spinoza og John Locke sem voru undanfarar Upplýsingarstefnunnar og frjálslyndra viðhorfa á seinni öldum. Ég byggi líka á skrifum eftirmanna þeirra sem mæltu fyrir frelsi almennings og nefni sérstaklega tvo, þá Georg Hegel og John Dewey. Enn fremur nýti ég nýleg skrif sálfræðinga og heimspekinga um sjálfstjórn.

Tilgátan er sett fram í þeirri trú að farsælt samfélag jafningja þurfi skynsamlegan skilning á hvað það er að vera frjáls og hvers vegna frelsið er dýrmætt. Ef tilgátan er rétt þá eru börn ekki borin frjáls heldur læra þau vera frjáls og sá lærdómur er hvorki auðveldur né fyrirhafnarlaus.

Um fyrirlesarann

Atli Harðarson er prófessor við Menntavísindasvið Háskóla Íslands. Hann hefur ritað bækur og greinar um heimspeki, bókmenntir og námskrárfræði. Nánari upplýsingar eru á vefsíðunni atlivh.com.