Sáttabækur. Gluggi inn í líf íslenskra kvenna á 19. og 20. öld

Harpa Rún Ásmundsdóttir sagnfræðingur heldur erindi í Málstofu í félags- og hagsögu sem nefnist: „Sáttabækur. Gluggi inn í líf íslenskra kvenna á 19. og 20. öld.“

Málstofan er í stofu 304 í Árnagarði, þriðjudaginn 11. mars kl. 16:00-17:00. Verið öll velkomin.

Um erindið

Laust fyrir aldamótin 1800 urðu sáttanefndir hluti af íslensku réttarkerfi og var hlutverk þessara nefnda að miðla málum milli einstaklinga og leita sátta í minniháttar ágreiningsefnum. Síðastliðið sumar var Gagnagrunnur sáttanefndabóka opnaður en í hann eru skráðar nær allar varðveittar sáttabækur frá 1798 fram til 1936. Bækurnar veita áhugaverða innsýn í hversdagslíf Íslendinga og ekki síst íslenskra kvenna sem margar nýttu sér nefndirnar til þess að sækja rétt sinn og leita lausna í deilumálum sínum. Í erindinu verður sjónum beint að því hvernig sáttabækur nýtast sem heimildir um líf íslenskra kvenna, hvaða konur komu fyrir nefndirnar og hvers konar mál þær voru viðriðnar.