Inntökupróf í BA-nám í íslensku sem öðru máli og Íslenskustoð

BA-nám í íslensku sem öðru máli og Íslenskustoð eru námsleiðir fyrir nemendur með góðan grunn í íslensku, samsvarandi stigi A2+ í Evrópska tungumálarammanum (CEFR). Í inntökuprófi reynir á færni sambærilega þeirri sem þjálfuð er í íslenskunámskeiðum 1-5 hjá framhaldsfræðsluaðilum eins og t.d. Mími. Til að undirbúa sig fyrir prófið geta nemendur til dæmis skoðað Icelandic Online Survival  og Icelandic Online 1 og 2 eða bækurnar Íslenska fyrir alla.

Inntökuprófið fyrir umsækjendur sem sækja um nám fyrir 1. febrúar fer fram á netinu. Prófið er tiltækt í sólarhring. Það opnar kl.12:00 (GMT) þann 10. mars og lokar kl.12:00 (GMT) þann 11. mars. Umsækjendur geta þreytt prófið hvenær sem er innan þessara tímamarka. Þeir hafa 90 mínútur til að leysa prófið.

Umsækjendur sem ná prófinu verða kallaðir í munnlegt próf í íslensku á netinu hjá prófdómara nokkrum dögum seinna. Þetta er gert til þess að staðfesta að umsækjandi hafi tekið inntökuprófið sjálfur og án hjálpargagna. Umsækjendur verða aðeins samþykktir í BA-nám eða Íslenskustoð ef þeir ná bæði inntökuprófinu og munnlega prófinu.

Inntökuprófið fyrir umsækjendur sem sækja um nám fyrir 20. maí er staðpróf og fer fram þann 10. júní kl.12:00 í Háskóla Íslands. Allir umsækjendur sem uppfylla inntökuskilyrði námsins verða sjálfkrafa skráðir í prófið og fá frekari upplýsingar um prófið í byrjun júní.

Umsækjendur sem geta ekki tekið prófið í Háskóla Íslands verða að taka það á viðurkenndum prófstöðum á Íslandi. Hér má finna lista yfir viðurkennda prófstaði á Íslandi. Umsækjendur verða að hafa samband við viðurkenndan prófstað, skrá sig í próf þar og senda upplýsingar um prófstaðinn á netfangið icelandic@hi.is.

Ath: Umsækjandi þarf að mæta í prófið með gild skilríki (vegabréf eða ökuskírteini). 

Inntökuprófið er í fjórum hlutum: lestur, hlustun, orðaforði og málfræði.

Sýnispróf má finna hér: 

• Spurningablað án réttra svara. 
• Spurningablað með réttum svörum. 
• Hljóðskrá fyrir hlustunarhlutann.

Ef umsækjandi telur að sýnisprófið sé of erfitt þá er best að breyta umsókinni og sækja í staðinn um hagnýtt nám í íslensku sem öðru máli .

Inntökuprófið verður tekið í rafræna prófakerfinu Inspera. Umsækjendur fá einnota notandanafn og lykilorð til að hafa aðgang að prófinu, líka þau sem eru nú þegar nemendur HÍ.

Engin hjálpargögn eru leyfð í inntökuprófinu.  

Ef umsækjandi nær ekki inntökuprófinu má hafa samband við Nemendaskrá (admission@hi.is) eða senda skilaboð í gegnum Samskiptagáttina til að óska eftir því að skipta yfir í námsleiðina Íslenska sem annað mál, hagnýtt nám. Ath: Skráning í Íslensku sem annað mál, hagnýtt nám gerir kröfu um að umsækjandi sýni fram á kunnáttu sína í ensku, með TOEFL-prófi (a.m.k. 79), IELTS-prófi (a.m.k. 6.5), eða PTE Academic (a.m.k. 58). Aðrar leiðir til að uppfylla kröfur um enskukunnáttu má finna hér.  

Próftökugjald er 15.000 kr. Greiðslan fer fram í gegnum umsóknargátt eftir að umsækjendur hafa verið samþykktir í próf.

Nemendur sem útskrifast úr námsleiðinni Íslenska sem annað mál, hagnýtt nám við HÍ frá og með árinu 2022 og eru að sækja um BA-námið í Íslensku sem öðru máli eða Íslenskustoð þurfa ekki að taka inntökuprófið ef meðaltal einkunna í skyldunámskeiðum er 7.25 eða hærra.   

Umsækjendur geta sent póst á netfangið icelandic@hi.is fyrir nánari upplýsingar.