Skráning hafin á Menntakviku 2019

Opnað hefur verið fyrir skráningu og móttöku ágripa fyrir árlega ráðstefnu Menntavísindasviðs Háskóla Íslands; Menntakvika – rannsóknir, nýbreytni og þróun, sem haldin verður föstudaginn 4. október í ár. Ráðstefnunni er ætlað að kynna og miðla því sem er efst á baugi í menntavísindum og á tengdum sviðum hverju sinni. Þetta verður í 23. skipti sem Menntakvika er haldin.

Í fyrra voru flutt yfir 200 erindi um fjölbreytt efni í 57 málstofum. Skipulag ráðstefnunnar verður með svipuðu sniði og undanfarin ár og sérstök áhersla verður lögð á heildstæðar málstofur frá rannsóknarstofum eða -hópum. Á dagskrá ráðstefnunnar í ár verða sem áður bæði málstofur og veggspjaldasýningar. Einnig er mögulegt að halda skipulagðar hringborðsumræður. 

Menntavísindasvið býður öllum sem stunda rannsóknir í menntavísindum, og tengdum sviðum, við Háskóla Íslands til þátttöku á ráðstefnunni en jafnframt starfsfólki frá stofnunum utan Háskólans. Undirbúningur og framkvæmd Menntakviku er í höndum Menntavísindastofnunar. 

Skráning er hafin, eins og fyrr segir, og búið er að opna fyrir móttöku ágripa. Skilafrestur ágripa er til miðnættis 1. júlí 2019. 
 
Fyrir utan að vera uppspretta nýrra hugmynda og þekkingar er ráðstefnan vettvangur mikilvægrar umræðu ár hvert.
 
Vinsamlegast sendið inn ágrip HÉR.

Ráðstefnan er öllum opin og það er enginn aðgangseyrir.

Sjá nánar á vef Menntakviku.