Verðlaunuð fyrir námsárangur í eðlisfræði og efnafræði
Tveir nemendur sem útskrifuðust úr grunnnámi með BS-gráðu í eðlisfræði og efnafræði við Háskóla Íslands háskólaárið 2015-2016 hljóta verðlaun úr Verðlaunasjóði Guðmundar P. Bjarnasonar frá Sýruparti á Akranesi. Verðlaunin voru veitt við hátíðlega athöfn á Háskólatorgi fimmtudaginn 23. júní. Nemendurnir eiga það sameiginlegt að hafa náð afburðaárangri í BS-námi sínu við Raunvísindadeild skólans og fengu háa ágætiseinkunn fyrir vikið.
Verðlaunaféð nemur tveimur milljónum króna og eru þetta með veglegustu verðlaunum sem útskriftarnemum eru veitt hér á landi.
Stefán Alexis Sigurðsson hlýtur eina milljón króna fyrir námsárangur í eðlisfræði með ágætiseinkunn 9,59. Hann hefur þegar hafið doktorsnám í læknisfræðilegri verkfræði við Brown-háskólann í Bandaríkjunum.
Anna Bergljót Gunnarsdóttir hlýtur eina milljón króna fyrir námsárangur í efnafræði með ágætiseinkunn 9,26. Hún mun hefja doktorsnám í efnafræði fastra efna við Cambridge-háskóla á Englandi í haust. Anna Bergljót lauk einnig BS-gráðu í verkfræðilegri eðlisfræði með ágætiseinkunn 9,25.
Átti ekki kost á að stunda háskólanám
Verðlaunasjóður Guðmundar P. Bjarnasonar frá Sýruparti á Akranesi var stofnaður árið 2000 með rausnarlegri gjöf Guðmundar til Háskóla Íslands. Guðmundur fæddist á Sýruparti á Akranesi árið 1909 og bjó um árabil á Höfða, dvalarheimili aldraðra á Akranesi. Hann lést í febrúarmánuði 2006 í hárri elli. Guðmundur átti þess ekki kost að stunda háskólanám en starfaði sem netagerðarmaður og fiskmatsmaður á Akranesi auk þess að stunda útgerð í félagi við bróður sinn. Guðmundur var einn af stofnendum Knattspyrnufélagsins Kára árið 1922 og Taflfélags Akraness árið 1933.
Ljóst er að hlutfallslega færri nemendur sækja háskólanám í eðlis- og efnafræði á Íslandi en í samanburðarlöndum okkar. Stuðningur Guðmundar við háskólanemendur í eðlis- og efnafræði er því mikilvægt lóð á þá vogarskál að hvetja unga Íslendinga að sækja nám í þessum greinum.
Stjórn Verðlaunasjóðs Guðmundar P. Bjarnasonar frá Akranesi skipa Guðmundur G. Haraldsson, prófessor í efnafræði, sem er formaður, Hafliði Pétur Gíslason, prófessor í eðlisfræði, og Eiríkur Dór Jónsson, fulltrúi Arion banka sem er vörsluaðili sjóðsins samkvæmt skipulagsskrá.
