Skoða hvernig tæknin eflir skapandi færni barna
Rannsóknarstofa um upplýsingatækni og miðlun (RANNUM) hefur að undanförnu tekið þátt í stóru alþjóðlegu samstarfsverkefni um börn og notkun stafrænna miðla. Verkefnið ber heitið MakEY (Makerspaces in the early years) og er hluti af COST-áætluninni. Óhætt er að segja að verkefnið sé afar viðamikið en þátttakendur koma frá sex löndum auk Íslands, þ.e. Danmörku, Þýskalandi, Finnlandi, Noregi, Rúmeníu, Bretlandi og Bandaríkjunum. Fulltrúar í íslenska rannsóknarhópnum eru frá háskólum, skólum og menntunarfyrirtækjum.
Strax á unga aldri eru börn orðin vön gagnvirku umhverfi snjalltækja og sitthvað bendir til þess að notkun slíkra tækja örvi sköpunargáfu barna og ímyndunarafl. „Meginmarkmið MakEY-verkefnisins er skoða hvernig tækni- og sköpunarsmiðjur geti eflt stafrænt læsi, hönnunarlæsi og skapandi færni barna á aldrinum 3-8 ára. Einnig að efla rannsóknir og nýsköpun á sviði stafræns læsis og sköpunarmátt barna í þeim tilgangi að auka samkeppnishæfni og hagvöxt í Evrópu,“ segir Skúlína H. Kjartansdóttir, doktorsnemi og aðjúnkt við Menntavísindasvið Háskóla Íslands, og ein þeirra sem fer fyrir íslenska rannsóknarhópnum.
Tilurð verkefnisins má rekja til þess að enn eru takmarkaðar upplýsingar til um það stafræna læsi og læsisreynslu sem evrópsk börn eru að tileinka sér. „Það leikur lítill vafi á að ung börn eru að verða fastagestir í stafrænni veröld sem getur haft á þau margvísleg áhrif. Þetta er verðugt athugunarefni fyrir þá sem starfa við menntun, því hæfni á þessu sviði er verðmæt fyrir framtíð þessara barna og nauðsynleg fyrir samfélag sem vill byggja á nýsköpun og geta endurskipulagt starfsemi sína í takt við tækniþróun,“ bætir Skúlína við en ljóst er að verkefni af þessu tagi er afar mikilvægt við stefnumörkun í menntamálum.
„Hæfni á þessu sviði er verðmæt fyrir framtíð barna og nauðsynleg fyrir samfélag sem vill byggja á nýsköpun og geta endurskipulagt starfsemi sína í takt við tækniþróun.“
Skúlína H. Kjartansdóttir, aðjúnkt við Háskóla Íslands
Ýmislegt er á döfinni hjá rannsóknarhópnum en áætlað er að verkefninu ljúki árið 2019. „Hópurinn mun halda áfram skiptiheimsóknum til annarra samstarfsaðila en nú þegar hafa nokkrar ferðir verið farnar í þeim tilgangi að að kynna sér starfsemi nýsköpunarsmiðja og hafa samráð við erlent vísindafólk. Hluti hópsins hefur unnið að fræðilegum grunni og útvíkkun rannsókna og þá hefur könnun verið send til íslenskra kennara um viðhorf til nýsköpunarsmiðja sem vinna með stafræna tækni (tæknismiðjur, gerver og snillismiðjur). Enn fremur er gert ráð fyrir að gera nokkrar tilviksrannsóknir á Íslandi um það umhverfi sem gerver spretta úr og uppsetningu þeirra á næstu mánuðum.“
Þess má geta að Rannsóknarstofa um upplýsingatækni og miðlun (RANNNUM) og Rannsóknarstofa um skapandi skólastarf (RASK) standa fyrir spennandi málstofu um verkefnið á Menntakviku, ráðstefnu Menntavísindasviðs Háskóla Íslands, sem haldin verður þann 6. október nk.
