Nýtt nám fyrir starfandi grunnskólakennara

Íslenska sem annað mál, náttúrufræðimenntun og dönskukennsla eru aðeins brot af þeim valmöguleikum sem starfandi grunnskólakennurum stendur til boða að taka í nýju diplómanámi við Menntavísindasvið Háskóla Íslands.

Um er að ræða nýjan valmöguleika í stuttu og hagnýtu námi á meistarastigi fyrir starfandi grunnskólakennara þar sem markmiðið er að kennarar dýpki þekkingu og færni í faggrein sinni. Diplóma í faggreinakennslu er 60 eininga nám sem hægt er að taka bæði í staðnámi og í fjarnámi með staðbundnum lotum. Nemendur hafa mikið val í náminu og í boði er fjöldi spennandi námskeiða. Hver og einn kennari ætti að finna eitthvað við sitt hæfi því kjörsviðin eru alls fjórtán. Sjá nánar HÉR.

Næsta skólaár verður í fyrsta sinn boðið upp á kjörsviðið íslenska sem annað mál sem meðal annars var stofnað til að mæta betur þörfum þeim vaxandi fjölda grunnskólabarna sem hafa annað móðurmál en íslensku. Þá eru einnig í gangi tvö sérstök átaksverkefni, annars vegar í náttúrufræðimenntun og hins vegar í dönskukennslu, sem verða aðeins í boði næsta skólaár. Þess ber að geta að nýjustu kjarasamningar leik- og grunnskólakennara kveða á um hækkun launa ef kennari bætir við sig einingabæru námi.

Umsóknarfrestur í námið er til 5. júní næstkomandi og sótt er um á hi.is.

Nánari upplýsingar veitir Sigríður Pétursdóttir deildarstjóri hjá Deild faggreinakennslu.