Mikil aðsókn í kennaranám í Háskóla Íslands

Hartnær 45 prósenta aukning milli ára í grunnskólakennaranám

Umsóknum í grunnskólakennaranám fjölgar um fjörtíu og fimm prósent milli ára. Þá fjölgaði umsóknum í meistaranám í leikskólafræðum um 25%. Þetta er sérlega ánægjulegt þar sem þjóðarátak hefur staðið yfir til að laða fólk í kennaranám hérlendis. Átakið hefur verið stutt af Lilju D. Alfreðsdóttur mennta- og menningarmálaráðherra sem hefur sagt að kennarar gegni mikilvægasta starfinu í samfélaginu.

„Það er veruleg ánægjulegt að sjá þessa auknu aðsókn í þetta mikilvæga nám, sérstaklega í ljósi þess átaks sem staðið hefur yfir með stjórnvöldum varðandi það að laða fólk í kennaranám. Við hefðum að óbreyttu horft fram á kennaraskort hérlendis á næstu árum,“ segir Jón Atli Benediktsson, rektor Háskóla Íslands. „Það er líka mjög ánægjulegt að sjá að umsóknum fjölgar í heildina umtalsvert í Háskóla Íslands.“

Kolbrún Þorbjörg Pálsdóttir, forseti Menntavísindasviðs tekur í svipaðan streng. „Það er gríðarlega ánægulegt að sjá þessa aukningu í kennaranám og blæs okkur á Menntavísindasviði Háskóla Íslands mikinn eldmóð í brjóst. Ég er handviss um að þessa sókn megi rekja til mikillar samstöðu í samfélaginu um að efla starfsumhverfi skóla og hefja kennarastarfið til þeirrar virðingar sem það á skilið,“ segir hún.

Kolbrún þakkar þessa auknu aðsókn einnig sértækum aðgerðum stjórnvalda vegna kennaraskorts sem felast í námsstyrkjum til kennaranema og launuðu starfsnámi á lokaári námsins.

„Góðir kennarar leiða uppbyggingu skóla sem skilar sér á margfaldan hátt til samfélagsins. Því er ákaflega dýrmætt að fleiri einstaklingar sjái hin fjölbreyttu tækifæri og í raun ævintýrin sem felast í því að starfa innan menntakerfisins.“

Hjá Menntavísindasviði er langmest fjölgun í Deild faggreinakennslu en hún er 54% milli ára. Í Deild kennslu- og menntunarfræða er fjölgunin hins vegar 25%.

Í grunnnám í leikskólakennarafræðum er fjöldi umsókna svipaður og í fyrra en rétt er að hafa í huga að frá 2016-2018 fjölgaði umsóknum í leikskólakennaranám um 86%. „Það er hins vegar gríðarlega ánægjulegt að fjórðungsaukning er í umsóknum í meistaranám í leikskólakennarafræði,“ segir Kolbrún. „Margar þjóðir takast á við ýmsar áskoranir í menntakerfinu og ein af þeim áskorunum er vaxandi skortur á kennurum, ekki síst á leikskólum og í grunnskólum. Hér á Íslandi vantar nú þegar til starfa um 1.400 leikskólakennara en um þriðjungur starfsfólks leikskóla eru menntaðir leikskólakennarar.“

Kolbrún segir að leiðbeinendum sem ráðnir séu til kennslu í grunnskólum hafi einnig fjölgað verulega á undanförnum árum og stefni í að ríflega 600 leiðbeinendur starfi við kennslu á næsta skólaári.

„Til að tryggja eðlilega nýliðun í stétt grunnskólakennara þarf að tvö- eða jafnvel þrefalda fjölda útskrifaðra nema,“ segir forseti Menntavísindasviðs.

Jón Atli rektor Háskóla Íslands segir það einnig afar jákvætt að í heildina fjölgi umsóknum umtalsvert í Háskóla Íslands en fyrstu tölur sýni um þrettán prósenta fjölgun milli ára. „Verið er að greina umsóknartölurnar eftir ákveðnum námsleiðum, deildum og fræðasviðum og verða heildarumsóknartölur kynntar strax eftir helgi.“