Alls 648 brautskráðust frá Menntavísindasviði HÍ þann 15. júní
Laugardaginn 15. júní síðastliðinn brautskráði Háskóli Íslands 2.652 kandídata úr grunn- og framhaldsnámi. Líkt og undanfarin ár var brautskráð í tvennu lagi og fóru brautskráningarathafnirnar fram í Frjálsíþróttahöllinni í Laugardal. Beint streymi var frá báðum athöfnum. Seinni athöfnin, hófst kl. 13.30, þar sem kandídatar í grunn- og framhaldsnámi frá Menntavísindasviði og Verkfræði- og náttúruvísindasviði sóttu. Alls brautskráðust 648 frá Menntavísindasviði og 262 frá Verkfræði- og náttúruvísindasvið. Auk þess brautskráðust 33 með viðbótardiplóma í þroskaþjálfafræði til starfsleyfis sem þroskaþjálfar.
Fjórar deildir tilheyra Menntavísindasviði og er skiptingin eftirfarandi:
- 189 brautskráðust frá Deild faggreinakennslu
- 108 brautskráðust frá Deild heilsueflingar, íþrótta og tómstunda
- 193 brautskráðust frá Deild kennslu- og menntunarfræði
- 158 brautskráðust frá Deild menntunar og margbreytileika
Þess má geta að 222 brautskráðust úr framhaldsnámi, 134 með viðbótardiplómu, 34 með grunndiplómu og 256 úr grunnnámi á Menntavísindasviði. Í hópnum voru 81 karlar og 567 konur.
Mikil aukning hefur verið í kennaranám undanfarin ár og brautskráðust 239 með kennaramenntun. Skiptingin er eftirfarandi:
- 84 brautskráðust úr leikskólakennarafræði og grunnskólakennslu yngri barna
- 78 brautskráðir úr kennaranámi frá Deild faggreinakennslu
- 32 brautskráðir með próf í menntun framhaldsskólakennara
- 22 brautskráðust sem íþróttakennarar
- 23 brautskráðust sem iðnmeistarar
Sérathöfn var haldin í Stakkahlíð á Menntavísindasviði þar sem Þroskaþjálfafélag Íslands fagnaði þeim 33 sem brautskráðust með viðbótardiplóma í þroskaþjálfafræði til starfsleyfis sem þroskaþjálfar.
Kolbrún Þ. Pálsdóttir, forseti Menntavísindasviðs hélt ávarp við athöfnina.
„Þið hafið nú aflað ykkar bæði þekkingar, hæfni og starfsréttindi til að sinna störfum sem eru ómetanlega dýrmæt. Þroskaþjálfar er mikilvæg fagstétt í samfélaginu sem vinnur að mannréttindum, lífsgæðum, jöfnuði, valdeflingu og virkri þátttöku. Gildi og fagmennska þroskaþjálfa hverfist um rétt einstaklinga til að þroskast, lifa og starfa í samfélagi við aðra og njóta lífsgæða.“
Í ávarpi sínu ræddi hún einnig tækni, gervigreind og kosti hennar og galla:
„Á tímum tæknivæðingar þar sem rætt er um að störf muni umbreytast og sum störf hætta að verða til þá er næsta víst að mikil þörf verður fyrir þroskaþjálfa á nánast öllum sviðum mannlífisins. Tækninni og gervigreindinni hefur fleytt gríðarlega fram á síðustu árum og er við það að yfirtaka öll svið lífs okkar, ekki eingöngu atvinnulíf og menntakerfi – heldur einnig okkar eigin persónulegu svæði, svæði sem áður lutu sínum eigin lögmálum, voru okkar eigin. Núna hlöðum við niður alls konar öppum og forritum og deilum upplýsingum um okkar sjálf og fáum ráð og tillögur frá gervigreindinni. Hún leiðbeinir okkur um samskipti, kortleggur svefn, næringu og hreyfingu, sendir okkur sífelld skilaboð, og leitast við að stjórna lífi okkar. Á sama tíma og tæknin er óendanlega mikilvægt verkfæri til að auðvelda okkur lífsverkefnin og ekki síst, aðstoða þau sem búa við skerta getu og jafna aðgengi þeirra að samfélaginu, þá getur tækni og gervigreind líka kippt okkur úr tengslum við eigin veruleika og vilja, og jafnvel slökkt á dómgreind okkar. Gott dæmi er hvernig Google Maps hefur tekið af okkur ansi mörgum hæfileikann til að læra að rata og lesa af korti! Aðalatriðið er þó að tæknin sjálf segir ekkert um hvað skiptir mestu máli eða hvernig lífi er eftirsóknarvert að lifa. Gervigreindarróbót mun ekki koma í stað fagfólks, s.s. þroskaþjálfa eða kennara, hvað þá foreldra, vina eða manneskja í lífi okkar,“ sagði Kolbrún.
Þess má geta að 53 brautskráðust einnig með BA-próf í þroskaþjálfafræði frá Háskóla Íslands og hefur verið mikill vöxtur í því námi. Menntavísindasvið flytur svo starfsemi sína í Sögu sem verður hús menntavísinda, við lok árs. Mikil deigla er á Menntavísindasviði sem á í öflugu samstarfi við fagvettvang og fjölbreytta hagaðila í samfélaginu.
