„Við sættum okkur ekki við ofbeldi“ - Reynsla stjórnenda í grunnskólum Reykjavíkur

Félag háskólakvenna efnir til hádegisfundar þriðjudaginn 11. október kl. 12.10 - 13.00 í stofu 101 á Háskólatorgi í Háskóla Íslands. Yfirskrift fundarins er „Við sættum okkur ekki við ofbeldi“ -  Reynsla stjórnenda í grunnskólum Reykjavíkur.

Á fundinum munu Ásmundur Einar Daðason mennta- og barnamálaráðherra flytja ávarp og Soffía Ámundadóttir gera grein fyrir niðurstöðum nýrrar rannsóknar sinnar til M.Ed prófs í stjórnun menntastofnana um ofbeldi sem börn beita.

Niðurstöður rannsókna sýna að börn beita ofbeldi vegna vanlíðanar, geðrænna erfiðleika, skorts á viðeigandi bjargráðum, samskiptahæfni og fleiri þátta. Miklu skiptir að grunnskólinn hlúi vel að námi og velferð barna. Kennarar, starfsfólk skóla og stjórnendur bera því mikla ábyrgð þegar kemur að því að koma til móts við þarfir nemenda og hjálpa þeim að þroskast við öruggar aðstæður.

Rannsóknin byggist á viðtölum við stjórnendur í grunnskólum í Reykjavík og markmið hennar er að varpa ljósi á reynslu stjórnenda af nemendum sem beita ofbeldi í skólastarfi og hvaða verkfæri stjórnendur skólanna hafa til að leysa slík mál.

Öll velkomin