Anna Jeeves, doktorsnemi við Deild erlendra tungumála, bókmennta og málvísinda
„Viðmælendur mínir telja ensku fremur skemmtilega námsgrein. Hún styrkir sjálfsmynd nemenda sem oft fá góðar einkunnir með lítilli fyrirhöfn. Það bendir til þess að námskröfur séu of litlar.“ Þetta segir Anna Jeeves, doktorsnemi í ensku, sem rannsakar viðhorf tungumálanema á efri skólastigum til ensku, gildis enskunámsins og hvernig það nýtist þeim í skóla og atvinnulífi. Anna Jeeves er íslenskur ríkisborgari en fædd og uppalin í London og því er enska móðurmál hennar. Foreldrar hennar voru báðir enskir en Anna flutti hingað til lands árið 1978 og talar nú íslensku sem innfædd. Hún lauk háskólanámi frá Trinity College í Dublin og er nú enskukennari við Fjölbrautaskólann í Garðabæ.
„Flestir þátttakendur í rannsókninni telja sig hafa öðlast betri málfærni í framhaldsskóla, bæði í ritun og tali, en einhverjir segjast ekkert gagn hafa haft af enskunáminu,“ segir Anna og bætir við: „Hugsanlegt er að tengsl skorti milli þess sem verið er að kenna og raunverulegra þarfa og notkunar. Langflestir eldri þátttakendur segjast nota ensku í mun víðara samhengi en þá óraði fyrir á skólaárunum.“
Anna Jeeves
„Viðmælendur mínir telja ensku fremur skemmtilega námsgrein. Hún styrkir sjálfsmynd nemenda sem oft fá góðar einkunnir með lítilli fyrirhöfn. Það bendir til þess að námskröfur séu of litlar.“
Að sögn Önnu lýsir doktorsrannsókn hennar viðhorfum ungra Íslendinga til enskunáms á framhaldsskólastigi. Viðtöl við 39 ungmenni á aldrinum 18 til 28 ára gefi innsýn í hvaða gildi enskunám í framhaldsskóla hafi fyrir þennan hóp og hvernig hann noti ensku í daglegu lífi, háskólanámi og starfi.
„Lítið hefur verið fjallað um gildi tungumálanáms og verður rannsóknin innlegg í alþjóðlega umræðu um viðhorf og sjálfsmynd nemenda og notenda erlendra tungumála. Ungmenni á Íslandi telja ensku vera lykil að heiminum og að líf á Íslandi án ensku sé næstum óhugsandi. Niðurstöðurnar lýsa sérstöðu enskunnar á Íslandi. Hana nota sumir þátttakendur daglega og jafnvel meira en íslensku.“
Anna segir að kveikjan að rannsókninni sé í meistaraverkefni hennar þar sem borin var saman lestrarfærni nemenda á íslensku og á ensku. „Í framhaldi af því vildi ég kanna betur enskunotkun ungra Íslendinga og þarfir þeirra fyrir ensku í námi og atvinnulífi og hvaða þýðingu enskunámið hefði fyrir þá. Von mín er að rannsóknin geti leitt til markvissari kennslu svo að nemendur verði sem færastir að nota málið að skólagöngu lokinni.“
Leiðbeinandi: Birna Arnbjörnsdóttir, prófessor við Deild erlendra tungumála, bókmennta og málvísinda.