Upplýsingafræðin 60 ára - ráðstefna
Í tilefni af því að námsbraut í upplýsingafræði verður 60 ára háskólaárið 2016-2017 var haldin ráðstefna í fyrirlestrasal Þjóðarbókhlöðu föstudaginn 18. nóv. kl. 9:00-17:00.
Á ráðstefnunni héldu kennarar og doktorsnemar í upplýsingafræði erindi um rannsóknir sínar. Einnig kynntu meistaranemar sem útskrifuðust árin 2015 og 2016 lokarannsóknir sínar.
Opnunarerindið var í höndum Sigurbjargar Jóhannesdóttur doktorsnema, en titill erindis hennar var „Opinn aðgangur að vísindaefni.“
Sífellt aukast kröfur um að vísindaefni sem styrkt er af opinberum stofnunum sé birt í opnum aðgangi, en í Bandaríkjunum og víðar hafa farið fram undirskriftarsafnanir á meðal almennings til að krefjast þess. Það er því augljóst að opinn aðgangur skiptir miklu máli fyrir samfélagið.
Í fyrirlestri sínum fjallaði Sigurbjörg um opinn aðgang að útgefnum vísindagreinum og rannsóknargögnum, hvað það þýðir þegar vísindaefni er í opnum aðgangi og hvers vegna það skiptir máli fyrir almenning.
Sigurbjörg fór einnig yfir stöðuna á Íslandi og þá skoðun íslenskra vísindamanna að þeir standi frammi fyrir vissum hindrunum þegar kemur að birtingu á vísindaefni í opnum aðgangi.
Veggspjaldasýning:
Doktorsnemar í upplýsingafræði kynntu jafnframt rannsóknir sínar á veggspjaldasýningu fyrir framan fyrirlestrarsalinn.
Dagskrána má skoða í viðburðadagatali: Námsbraut í Upplýsingafræði 60 ári.