Lestin er að fara
Vorið er komið og það þýðir Háskólest Háskóla Íslands rúllar af stað um landið. Lestin hefur verið starfrækt frá aldarafmælisári Háskóla Íslands árið 2011 og áherslan í starfi hennar er á að kynna vísindi á lifandi, skemmtilegan og fjölbreyttan hátt fyrir ungu fólki.
Háskólestin hefur heimsótt vel á fjórða tug sveitarfélaga um allt land frá síðustu átta árum en lestin stoppar alla jafna í tvo daga á hverjum stað, föstudag og laugardag. Á föstudeginum tekur áhöfn Háskólalestarinnar að sér kennslu í efri bekkjum grunnskóla á staðnum og býður þar upp á fjölmörg spennandi námskeið úr Háskóla unga fólksins. Á laugardeginum er svo slegið upp vísindaveislu fyrir alla fjölskylduna og þar geta gestir á öllum aldri spreytt sig á alls kyns þrautum, tækjum og tólum. Veislan fer ýmist fram í félagsheimili eða íþróttahúsi staðarins.
Háskólalestin heimsækir fjögur sveitarfélög að þessu sinni en það eru: Hveragerði (3. - 4. maí), Bolungarvík (10. - 11. maí), Fjallabyggð (17. - 18. maí) og Djúpivogur (24. - 25.maí). Áhöfnin tók enn fremur forskot á sæluna með svokallaða smálest í Njarðvíkurskóla þann 8. apríl sl.
Á fyrsta áfangastað ferðarinnar, Hveragerði, taka nemendur í sjöunda til tíunda bekk grunnskólans þátt í völdum námskeiðum úr Háskóla unga fólksins. Í boði verða samtals tíu námskeið fyrir unga fólkið um bókstaflega allt milli himins og jarðar því þau fjalla um stjörnufræði, eðlisfræði af ýmsum toga, efnafræði, tómstunda- og félagsmálafræði, forritun, japönsku, fornleifafræði, vindmyllusmíði og vísindaheimspeki.
Litrík vísindaveisla fer síðan fram í íþróttahúsi grunnskólans í Hveragerði laugardaginn 4. maí. Þangað eru allir heimamenn og nærsveitamenn velkomnir enda er um sannkallaða fjölskylduskemmtun að ræða þar sem kynslóðirnar spreyta sig í sameiningu á ýmsum skemmtilegum viðfangsefnum og gera óvæntar uppgötvanir.
Hægt er að forvitnast frekar um Háskólalestina á heimasíðu hennar.
