Sýn Háskóli Íslands (HÍ) lítur á gervigreind (AI) sem grundvallartæki sem muni umbylta námi, kennslu, rannsóknum og störfum. Skólinn stefnir að því að vera í fararbroddi í ábyrgri nýtingu gervigreindar á Íslandi. Stefnan er að nemendur og starfsfólk verði ekki aðeins ábyrgir notendur tækninnar, heldur þekki takmarkanir hennar, beiti gagnrýninni hugsun við notkun hennar og verði þannig tilbúin að mæta kröfum framtíðarinnar. Stefnan hvílir á þremur megin stoðum: 1. Færni og þekking Markmið: Að nemendur og starfsfólk hafi framúrskarandi þekkingu og færni til að nýta gervigreind á ábyrgan, gagnrýninn og skapandi hátt í sínu námi og starfi. Leiðir: HÍ muni bjóða upp á markvissa og aðgengilega fræðslu, leiðbeiningar og þjálfun um gervigreind fyrir allt háskólasamfélagið. Lögð verður áhersla á að byggja upp gervigreindarlæsi sem felur í sér siðferðilega meðvitund, skilning á takmörkunum og getu til að meta áreiðanleika upplýsinga. Kennarar fá stuðning til að samþætta gervigreind í kennslu og endurhanna námskeið og námsmat til að endurspegla nýjan veruleika. 2. Skilvirkni og nýsköpun Markmið: Að nýta gervigreind til að auka skilvirkni í stjórnsýslu, rannsóknum og kennslu og skapa svigrúm til nýsköpunar. Leiðir: Gervigreind verður nýtt til að einfalda stjórnsýsluferla og gera þá skilvirkari, bæta þjónustu og draga úr endurtekinni handavinnu. Stuðlað verður að nýtingu gervigreindar í rannsóknum til að efla greiningargetu og opna nýjar rannsóknarleiðir. Starfsfólk verður hvatt til að þróa og deila aðferðum þar sem gervigreind styður við kennslu og undirbúning hennar. 3. Jafnræði og aðgengi Markmið: Að nemendur og starfsfólk hafi jöfn tækifæri til að nýta sér þau gervigreindartæki og þann stuðning sem Háskólinn býður upp á. Leiðir: HÍ mun vinna að því að tryggja sem jafnastan aðgang allra að nauðsynlegum gervigreindarhugbúnaði og innviðum. Skýrar, samræmdar og sanngjarnar reglur um notkun gervigreindar verða settar til að tryggja jafnræði nemenda í námsmati. Meðvitund um aðgengis- og jafnréttisáskoranir, svo sem hlutdrægni í líkönum, verður samþætt allri fræðslu og innleiðingu. Leiðarljós við innleiðingu Til að tryggja farsæla innleiðingu á stefnunni mun Háskólinn fylgja eftirfarandi leiðarljósum: Akademískur heiðarleiki: Nemendur og starfsfólk bera ábyrgð á öllu efni sem þau leggja fram í eigin nafni og skulu virða reglur og viðmið um siðferði og vönduð vinnubrögð í vísindum. Brot nemenda á fyrirmælum kennara um notkun gervigreindar við verkefnavinnu, ritgerðasmíðar og í prófum varðar eftir atvikum viðurlögum, samkvæmt 19. gr. laga um opinbera háskóla. Ávallt skal gera grein fyrir notkun gervigreindar í samræmi við fyrirmæli. Samræmdar leiðbeiningar: Háskólinn mun þróa skýr og samræmd sniðmát fyrir leiðbeiningar um notkun gervigreindar í námskeiðum og í stjórnsýslu til að koma í veg fyrir misræmi og óvissu meðal nemenda og starfsfólks. Gagnaöryggi, mannréttindi og persónuvernd: Öll notkun, þróun og innleiðing á gervigreindarkerfum verður í samræmi við gildandi lög um persónuvernd. Gerðar verða skýrar kröfur um meðferð gagna Háskólans hjá þriðju aðilum og starfsfólki veittar skýrar leiðbeiningar um meðhöndlun gagna. Samþætting og samstarf: Innleiðing og notkun gervigreindar verður samþætt starfsemi núverandi kjarnasviða (s.s. Kennslusviðs, Upplýsingatæknisviðs og Vísinda- og nýsköpunarsviðs) til að tryggja faglega ábyrgð og víðtæka samvinnu. Endurskoðun og framtíðarsýn Gervigreindartækni þróast með fordæmalausum hraða og stöðugt koma fram ný tæki, tækifæri og áskoranir. Þessi stefna er því í eðli sínu lifandi skjal, en ekki óhreyfanlegur áfangastaður. Til að tryggja að Háskóli Íslands haldi áfram að vera í fararbroddi er nauðsynlegt að fylgjast náið og gagnrýnið með tækniframförum. Stefnan, og sú aðgerðaáætlun sem henni fylgir, verður að sæta reglulegri endurskoðun og aðlögun. Meta þarf árangur innleiddra aðgerða og bregðast við þeirri reynslu sem skapast innan skólans til að tryggja að stefnan þjóni markmiðum sínum um færni, skilvirkni og jafnræði til framtíðar. facebooklinkedintwitter
