Fyrirlestrar um Piketty og bankahrun

Dr. Hannes Hólmsteinn Gissurarson, prófessor í stjórnmálafræði, flutti fyrirlestur um kenningu franska hagfræðingsins Thomasar Pikettys á fjölmennu þingi Evrópusamtaka frjálslyndra stúdenta, European Students for Liberty, í Reykjavík 15. nóvember 2014. Taldi Hannes sennilega hafa teygst á tekjudreifingu á Vesturlöndum síðustu áratugi, eins og Piketty héldi fram, en hins vegar hefði tekjudreifingin í heiminum öllum orðið jafnari. Hvort tveggja væri þetta afleiðing hnattvæðingarinnar, aukinna alþjóðaviðskipta, og ástæðulaust að hafa af þessu áhyggjur. Fátækt væri böl en auðlegð væri það ekki. Á meðal annarra fyrirlesara voru Helgi Hrafn Gunnarsson, alþingismaður Pírata, og dr. Birgir Þór Runólfsson hagfræðidósent.

Hannes Hólmsteinn flutti fyrirlestur í einni kunnustu hugveitu Breta, Institute of Economic Affairs í Lundúnum, 27. nóvember um hlut Breta að bankahruninu íslenska. Benti hann á, að í Skotlandi og Sviss hefðu bankakerfin verið hlutfallslega jafnstór eða jafnvel stærri en á Íslandi og að stærstu bankar þessara landa hefðu verið að falli komnir, RBS í Skotlandi og UBS í Sviss. Þeim hefði hins vegar verið bjargað, meðal annars af Englandsbanka og bandaríska seðlabankanum, sem hefði gert víðtæka gjaldeyrisskiptasamninga við evrópska seðlabanka. Íslendingum hefði hins vegar verið neitað um slíka gjaldeyrisskiptasamninga, svo að bankar hér hefðu fallið.

Hannes vakti athygli á, að einu bresku bankarnir, sem ekki fengu lausafjárfyrirgreiðslu í október 2008, voru bankar í eigu Íslendinga, Heritable Bank og Kaupthing Singer & Friedlander. Uppgjör þeirra sýndu hins vegar að þeir hefðu átt fyrir skuldum. Bretar hefðu sýnt mikla óbilgirni gagnvart Íslendingum, ekki síst með beitingu hryðjuverkalaga.

Hannes Hólmsteinn vinnur nú á vegum Félagsvísindastofnunar Háskóla Íslands að verkefni fyrir fjármálaráðuneytið um erlenda áhrifaþætti bankahrunsins.