Sandra Mjöll Jónsdóttir-Buch, doktorsnemi við Læknadeild
„Verkefnið snýst fyrst og fremst um að betrumbæta þær aðferðir sem notaðar eru til að rækta beinmyndandi stofnfrumur á rannsóknastofum í dag. Það er alþjóðleg krafa að nota sem minnst af dýraafurðum við stofnfrumurækt en það hefur gengið illa að finna eitthvað annað til að rækta beinmyndandi stofnfrumur,“ segir Sandra Mjöll Jónsdóttir-Buch, doktorsnemi í líf- og læknavísindum, um verkefni sem hún hefur unnið að frá árinu 2011.
Sandra Mjöll Jónsdóttir-Buch
„Verkefnið snýst fyrst og fremst um að betrumbæta þær aðferðir sem notaðar eru til að rækta beinmyndandi stofnfrumur á rannsóknastofum í dag. Það er alþjóðleg krafa að nota sem minnst af dýraafurðum við stofnfrumurækt en það hefur gengið illa að finna eitthvað annað til að rækta beinmyndandi stofnfrumur.“
Svokallað kálfasermi hefur hingað til verið notað sem æti við ræktun þessara fruma en sú ræktun er afar mikilvæg fyrir rannsóknir á ýmsum sjúkdómum. Augu vísindamanna beinast nú að því að nýta blóðflögur í stað kálfasermisins. „Við í Blóðbankanum sáum að við værum í góðri aðstöðu til að þróa þá aðferð frekar. Við ákváðum því að athuga hvort hægt væri að nýta útrunnar blóðflögur, sem ætti annars að henda, til þess að búa til bætiefni fyrir frumurnar. Þannig höfum við þróað aðferð þar sem hráefni Blóðbankans er nýtt út í ystu æsar án þess að það hafi áhrif á starfsemi bankans, auk þess sem við tryggjum að bætiefnið sem við framleiðum sé úr fyrsta flokks hráefni,“ útskýrir Sandra.
Rannsóknirnar hafa þegar leitt í ljós ýmsa kosti þess að nota útrunnar blóðflögur til að rækta beinmyndandi stofnfrumur. „Við höfum svo haldið áfram rannsóknum okkar á áhrifum bætiefna úr útrunnum blóðflögum á aðrar gerðir fruma auk þess sem við erum núna að skoða áhrif þeirra á beinmyndun hjá beinmyndandi stofnfrumum sérstaklega,“ segir Sandra um framvindu rannsóknanna.
Sandra er með bakgrunn í lífeindafræði og segist afar þakklát fyrir að hafa fengið að taka þátt í verkefninu. „Mér finnst mjög spennandi að vera partur af því að gera ræktunina á beinmyndandi stofnfrumum öruggari fyrir læknisfræði framtíðarinnar og það að hætta að nota dýraafurðir er partur af því. Þar að auki er mjög hagstætt að geta notað efnivið sem á að farga til þess að afla nýrrar þekkingar,“ segir hún að lokum.
Leiðbeinandi: Ólafur Eysteinn Sigurjónsson, stjórnandi stofnfrumurannsókna hjá Blóðbankanum.