Guðrún Ragnarsdóttir, doktorsnemi við Menntavísindasvið
Skortur á upplýsingum um starf og velferð íslenskra framhaldsskólakennara varð kveikjan að rannsókn sem Guðrún Ragnarsdóttir, doktorsnemi í menntavísindum, hefur unnið að. „Þetta er langtímarannsókn sem unnin er upp úr stórum gagnabanka sem ég hef safnað á tveggja ára fresti frá því fyrir efnahagshrun 2008. Fyrsta gagnasöfnunin á rætur sínar að rekja til meistaraverkefnis míns í lýðheilsuvísindum,“ segir Guðrún en rannsóknin er hluti af doktorsrannsókn hennar sem hlaut styrk úr Háskólasjóði Eimskipafélags Íslands vorið 2013.
Guðrún Ragnarsdóttir
Skortur á upplýsingum um starf og velferð íslenskra framhaldsskólakennara varð kveikjan að rannsókn sem Guðrún Ragnarsdóttir, doktorsnemi í menntavísindum, hefur unnið að.
„Ég var í þungum þönkum á leiðinni í skólann haustið 2007, ekki alveg sátt við það viðfangsefni sem ég stefndi að í lokaverkefninu í lýðheilsuvísindum. Þá frétti ég af rannsókn á starfsumhverfi kvengrunnskólakennara. Ég varð heilluð af hugmyndinni og ákvað að gera viðlíka rannsókn á starfsumhverfi framhaldsskóla- kennara,“ segir Guðrún. Í samstarfi við Félag framhaldsskólakennara útbjó hún stóran spurningalista fyrir kennara í allflestum framhalds- skólum landsins og hann hefur verið lagður fyrir þrisvar á síðustu árum. „Það er verðmætt að vera með mælingar frá því í upphafi árs 2008, rétt fyrir hrun, og svo á tveggja ára fresti eftir það,“ segir Guðrún.
Niðurstöðurnar eru sláandi. „Þær sýna marktækt lengri vinnudag hjá framhaldsskólakennurum frá því fyrir efnahagshrun, stóraukna starfstengda streitu og vinnuálag, dalandi starfsánægju, aukið álag vegna fjölmennari nemendahópa og þar af leiðandi minna svigrúm en áður til að sinna nemendum með sérþarfir. Framhaldsskólakennarar eru almennt jákvæðir gagnvart námskrárbreytingunum sem innleiddar voru sumarið 2008. Þeir finna þó fyrir stórauknu álagi í starfi vegna innleiðingarinnar og þurfa tíma til að innleiða breytingarnar og breyta eigin starfsháttum,“ segir Guðrún.
Hún segir rannsóknina skipta miklu máli fyrir framhaldsskólakerfið í heild sinni. „Rannsóknin er jafnframt mikilvægt tæki til að stuðla að umbótum og hún er einnig mikilvæg fyrir alþjóðasamfélagið sem horfist í augu við sambærilegar áskoranir og við, hér á landi, í þessum efnum,“ segir Guðrún að lokum.
Leiðbeinendur: Ingólfur Ásgeir Jóhannesson og Jón Torfi Jónasson, prófessorar við Kennaradeild.