Hildur Blöndal Sveinsdóttir, meistaranemi í Uppeldis- og menntunarfræðideild
Hildur Blöndal Sveinsdóttir skoðaði reynslu íslenskra barna af aðlögun að íslensku samfélagi og skóla eftir búsetu og skólagöngu erlendis í meistaraverkefni sínu. Hún vill með rannsókninni vekja athygli á hópi sem lítill gaumur hefur verið gefinn í íslenskum skólum.
„Niðurstöður benda til þess að einstaklingar sem alast upp við þessar alþjóðlegu aðstæður búi yfir ákveðinni færni og viðhorfum til lífsins sem mótast hafa af skólagöngu í alþjóðlegum skóla og reynslunni af flutningum milli landa,“ segir Hildur. Þessir þættir séu t.d. jákvæðni, samskiptahæfni, víðsýni og umburðarlyndi. Auk þess búi þau yfir fjölbreyttri tungumálakunnáttu sem oft reynist erfitt að viðhalda við heimkomu. Hildur segir sárustu reynsluna tengjast vinamissi og því að kveðja góða vini, sem kristallast í ákveðnu sorgarferli. Þetta sé sá þáttur sem allir þátttakendur nefna sem neikvæða hlið þessa lífsstíls.
Hildur Blöndal Sveinsdóttir
Hildur skoðaði reynslu íslenskra barna af aðlögun að íslensku samfélagi og skóla eftir búsetu og skólagöngu erlendis í meistaraverkefni sínu.
Í rannsókninni kom fram að foreldrar urðu fyrir vonbrigðum vegna úrræðaleysis íslenskra skóla við heimkomu. Lítinn eða engan stuðning hafi verið að fá í íslensku máli fyrir þessa nemendur sem annars standa sig vel í skóla. „Að öðru leyti eru þátttakendur sammála um að búseta erlendis hafi styrkt fjölskylduböndin og þar hafi fjölskyldan notið meiri samveru en hún gerir þegar heim er komið,“ segir Hildur. Helstu kostir heimkomunnar séu það frelsi og sjálfstæði sem börnin búa við á Íslandi. Reynsla sem þessi sé í senn þroskandi og mannbætandi og við hana öðlist einstaklingarnir færni sem nýtast mun þeim í framtíðinni.
Hildur vonast til að hægt verði að nýta niðurstöðurnar til að koma betur til móts við þarfir barna sem flytja heim frá útlöndum og auðvelda aðlögun þeirra að íslensku skólakerfi. „Ef við virðum þá þekkingu og þann menningarlega bakgrunn sem nemendur taka með sér í skólann aukum við líkurnar á árangri og vellíðan nemenda,“ segir Hildur.
Leiðbeinandi: Hanna Ragnarsdóttir, deildarforseti Uppeldis- og menntunarfræðideildar.