Ingibjörg Svala Jónsdóttir, prófessor við Líf- og umhverfisvísindadeild, og Ana Judith Russi Colmenares, doktorsnemi í líffræði
Takmörkuð þekking á hlutverki mosa í vistkerfum, og þá sérstaklega samspili mosa og örvera, er kveikja að rannsókn sem Ingibjörg Svala Jónsdóttir, prófessor við Líf- og umhverfisvísindadeild, og Ana Judith Russi Colmenares, doktorsnemi hennar, hyggjast ráðast í á þessu ári.
„Mosar eiga stóra hlutdeild í gróðri jarðar, einkum á norðurlóðum. Eins og aðrar plöntur eru mosar frumbjarga (ljóstillífandi) en nýlegar rannsóknir sýna að vistfræðilegt hlutverk þeirra einskorðast ekki við frumframleiðslu. Samfelld mosaþekja mótar skilyrði fyrir starfsemi örvera í jarðvegi vegna einangrandi áhrifa og hefur þar af leiðandi áhrif á hraða hringrásar næringarefna í vistkerfum,“ segir Ingbjörg Svala. Hún hefur áður rannsakað mosarík vistkerfi á Íslandi og Svalbarða og sýnt fram á að þykk mosaþekja geti takmarkað hringrás næringarefna.
Ingibjörg Svala Jónsdóttir
„Mosar eiga stóra hlutdeild í gróðri jarðar, einkum á norðurlóðum. Eins og aðrar plöntur eru mosar frumbjarga (ljóstillífandi) en nýlegar rannsóknir sýna að vistfræðilegt hlutverk þeirra einskorðast ekki við frumframleiðslu.“
Ingibjörg Svala bendir einnig á að nýlegar rannsóknir bendi til þess að í mosaþekjunni sjálfri geti skapast hagstæð skilyrði fyrir blágrænar bakteríur. „Auk þess að vera frumbjarga hafa blágrænar bakteríur hæfileika til að binda köfnunarefni úr andrúmsloftinu en köfunarefni er mjög takmarkandi næringarefni í vistkerfum á norðurslóðum. Engar rannsóknir hafa farið fram á þessu margslungna samspili hér á landi. Markmiðið er því að rannsaka samspil mosa og örvera í íslenskum vistkerfum í ljósi mismunandi beitarálags og loftslagsbreytinga,“ segir Ingbjörg Svala.
„Við teljum að vistfræði mosa og samspil þeirra við örverur sé afar brýnt rannsóknarefni á norðlægum slóðum, ekki síst til að skilja og spá fyrir um það hvernig vistkerfi svara loftslagsbreytingum. Svörunin getur verið mismunandi eftir beitarálagi stórra beitardýra og því munum við einnig skoða þann þátt,“ segir Ingbjörg Svala að endingu um rannsóknina.