„Það er mikil þörf fyrir nýja íslenska barnabókmenntasögu því að eina bókin þeirrar tegundar er orðin 32 ára. Það er stórvirkið Íslenskar barnabækur 1780-1979 eftir Silju Aðalsteinsdóttur. Síðan hefur mikið gerst bæði í barnabókmenntunum sjálfum og fræðunum,“ segir Dagný Kristjánsdóttir, prófessor í íslenskum nútímabókmenntum, um bók sem hún vinnur að þessi misserin. Auk hennar ritstýrir áðurnefnd Silja hinni nýju barnabókmenntasögu og þá koma bæði doktorsnemar í barnabókmenntum og barnabókasérfræðingar að vinnu við hana.
Dagný Kristjánsdóttir
„Það er mikil þörf fyrir nýja íslenska barnabókmenntasögu því að eina bókin þeirrar tegundar er orðin 32 ára.“
Dagný segir bókina hugsaða bæði fyrir skólafólk og almenning. „Það er verið að kenna námskeið í barnabókmenntum víða í skólum og þar mun bókin nýtast vel. Sömuleiðis býst ég við að margir foreldar vilji eignast slíka bók, bæði sér til skemmtunar og sem leiðarvísi við val á bókum fyrir börnin sín,“ segir Dagný. Hún bætir við að bókin sé samt fræðirit. „Í henni
koma saman umtalsverðar frumrannsóknir bæði á eldri og yngri tímabilum, hugmyndum um bernskuna, barnamenningu, barnabókmenntum og menningarefni fyrir börn.“
Bókin spannar síðustu þrjár aldir eða tímabilið frá 1700 til nútímans. „Við hefðum getað byrjað á landnáminu og miðaldabörnum af því að við takmörkum okkur ekki aðeins við prentað efni ætlað börnum. Það var hins vegar ákveðið að afmarka bókina við átjándu öldina og nútímalega vitund um að bernskan sé sérstakt æviskeið sem lýtur eigin lögmálum,“ útskýrir Dagný.
Aðspurð segir hún margt hafa komið sér á óvart í rannsóknarvinnunni, „ekki minnst við það að tengja íslenskar barnabækur og barnamenningu við nágrannalönd og alþjóðlegt barnaefni. Öll þessi vinna hefur verið ótrúlega gefandi og fróðleg,“ segir Dagný um bókina, en áætlað er að hún komi út á vormánuðum 2015.