Morgane Priet-Mahéo, doktorsnemi við Umhverfis- og byggingarverkfræðideild
Lagarfljót á Austurlandi hefur löngum verið hjúpað leyndardómsfullum blæ, ekki síst vegna sagna af kynjaskepnu sem á að synda þar um, Lagarfljótsorminum. Ólíklegt er þó að hann standi á bak við sérstaka strauma sem Morgane Priet-Mahéo rannsakar í doktorsnámi sínu.
Morgane bendir á að fylgst hafi verið með Lagarfljóti í um áratug, meðal annars með það fyrir augum að kanna áhrif framkvæmdanna
við Kárahnjúkavirkjun á stöðuvatnið. Hún nýtur leiðsagnar Hrundar Ólafar Andradóttur, dósents við Umhverfis- og byggingarverkfræðideild, sem hefur rannsakað straumfræði Lagarfljóts allt frá árinu 2008 og komist að því að innri bylgjur ganga um
stöðuvatnið á 3 til 6 daga fresti.
Morgane Priet-Mahéo
„Mælingar í Lagarfljóti hafa sýnt að innri hreyfilögmál stöðuvatnsins eru flókin. Í rannsókninni ætla ég að búa til þrívíddarstraumfræðilíkan af stöðuvatninu og kanna hvort það virkar vel gagnvart þessum hreyfilögmálum.“
„Mælingar í Lagarfljóti hafa sýnt að innri hreyfilögmál stöðuvatnsins eru flókin. Í rannsókninni ætla ég að búa til þrívíddarstraumfræðilíkan af stöðuvatninu og kanna hvort það virkar vel gagnvart þessum hreyfilögmálum. Ef líkanið heppnast vel öðlumst við nýja sýn inn í þau ferli sem einkenna stöðuvötn rétt sunnan við norðurheimskautsbaug og það gerir okkur hugsanlega kleift að spá fyrir um hugsanleg áhrif loftslagsbreytinga á slík stöðuvötn,“ segir Morgane.
Morgane hefur þegar lagst í ýmiss konar rannsóknir á stöðuvatninu með sérstökum búnaði, þar á meðal hitastigi vatnsins, gruggdreifingu og straumhraða. „Það má reikna með því að hnattræn hlýnun hafi mikil áhrif á umhverfið rétt sunnan við norðurheimskautsbaug og þá sérstaklega stöðuvötn í því belti, ekki síst af völdum hækkandi lofthita og bráðnunar jökla sem sjá stöðuvötnunum fyrir vatni. Það er mikilvægt að öðlast betri skilning á innri straumfræði stöðuvatnanna, sem ræður miklu um gæði vatnsins og vistkerfisins, til þess að ná betur utan um þau áhrif sem loftslagsbreytingar munu hafa í framtíðinni,“ segir Morgane.