Berglind Hálfdánsdóttir, ljósmóðir og doktorsnemi við Háskóla Íslands hlaut nýlega styrk úr Minningarsjóði Bjargar Magnúsdóttur ljósmóður og Magnúsar Jónassonar bónda. Rannsókn hennar snýst um útkomu og áhrifaþætti heimafæðinga á Íslandi og er tilgangurinn að styðja við þróun barneignarþjónustu í heilbrigðiskerfinu. „Rannsóknin tekur fyrst og fremst til hraustra kvenna og ber útkomu heimafæðinga saman við útkomu sjúkrahúsfæðinga í sambærilegum hópum,“ segir Berglind. Kveikjan að rannsókn Berglindar er sú staðreynd að heimafæðingum á Íslandi hefur fjölgað mikið á síðustu árum. „Þær nálgast nú 2% fæðinga, sem er hærra hlutfall en í flestum vestrænum ríkjum. Enn hefur ekki verið gerð fræðileg rannsókn á útkomu fæðinga sem sinnt er á þessu þjónustustigi hér á landi.“
Berglind Hálfdánsdóttir
„Rannsóknin tekur fyrst og fremst til hraustra kvenna og ber útkomu heimafæðinga saman við útkomu sjúkrahúsfæðinga í sambærilegum hópum“
Berglind útskýrir að barneignarþjónustu sé hægt að veita við á mismunandi hátt við ólíkar aðstæður. „Hver fæðing er einstök og ekki sjálfgefið að sama þjónusta henti öllum fjölskyldum. Fjölbreytt þjónusta sem veitt er í takt við óskir verðandi foreldra og byggð á grunni vísindalegrar þekkingar er að mínu mati forsenda áframhaldandi þróunar barneignarþjónustu í heilbrigðiskerfinu.“ Þar sem rannsóknin er á frumstigi hafa niðurstöður ekki enn komið fram. „Erlendar rannsóknir á sambærilegum hópum hraustra kvenna leiða gjarnan í ljós jafn góða eða betri útkomu heimafæðinga þegar þær eru bornar saman við sjúkrahúsfæðingar. Þó þessar niðurstöður séu í góðu samræmi við hugmyndafræði ljósmæðra um fæðingu sem náttúrulegt, lífeðlislegt ferli er útkoma rannsókna á heimafæðingum háð þjónustu og staðháttum í hverju landi, og því ekki hægt að fullyrða að þessar niðurstöður eigi við um Ísland.“
Með rannsókn sinni leggur Berglind sitt af mörkum í þekkingargrunn íslenskrar ljósmóðurfræði, sem er ung fræðigrein hérlendis. Auk þess munu niðurstöður bæta við þekkingu á útkomu heimafæðinga sem orðið hafa til á síðustu árum víða um heim.