Martin Hensch, nýdoktor við Jarðvísindadeild
„Ég rannsaka fyrirboða eldgosa og niðurstöður þeirra rannsókna verður hugsanlega hægt að nýta til að spá fyrir um eldgos,“ segir Martin Hensch, doktor frá Háskólanum í Hamborg. Hann kom hingað til lands árið 2009 og fékk nýdoktorsstöðu við Háskóla Íslands og síðan starf við Veðurstofu Íslands árið 2012. Á Veðurstofunni nýtir hann fyrirliggjandi jarðskjálftagögn til þess að þróa ferla sem ætlað er að reikna út staðsetningu kviku í jarðskorpunni með meiri nákvæmni en áður hefur þekkst.
Martin Hensch
„Ég rannsaka fyrirboða eldgosa og niðurstöður þeirra rannsókna verður hugsanlega hægt að nýta til að spá fyrir um eldgos.“
„Jarðskjálftamælingar frá Eyjafjallajökli gerðu okkur kleift að rannsaka staðbundna spennu undir eldfjallinu. Við reiknuðum út upptakahreyfingar jarðskjálftanna sem voru undanfarar eldgosanna. Þetta gerir okkur kleift að fylgjast með kviku á hreyfingu í jarðskorpunni upp að vissu marki. Markmiðið er að mæla þessar hreyfingar í rauntíma eða svo til strax eftir að jarðskjálfti eða skjálftahrinur ganga yfir,“ segir Martin.
Jarðskjálftamælingar frá vorinu 2010 sýna að kvika tók að safnast undir eldfjallinu áður en fyrsta sprungan opnaðist á Fimmvörðuhálsi í mars. „Meginspennustefna var lárétt og þangað leitaði kvikan og það bendir til þess að kvikan hafi safnast fyrir undir eldfjallinu. Nokkrum stundum fyrir stóra gosið á toppi Eyjafjallajökuls í apríl 2010 breyttist spennustefnan úr láréttri stöðu í lóðrétta. Afstöðubreytingin sýnir augljóslega að mikill þrýstingur var undir eldstöðvarkerfinu og að kvikan þurfi að komast upp,“ segir Martin.