Hulda Þórisdóttir, doktor frá New York háskóla, stjórnmálasálfræðingur og lektor við Stjórnmálafræðideild
Ótti almennings hefur áhrif á stjórnmálaviðhorf og getur valdið íhaldssömum skoðunum. Svo hljóða niðurstöður Huldu Þórisdóttur,stjórnmálasálfræðings og lektors við HÍ. Niðurstöðurnar voru liður í doktorsrannsókn Huldu við New York háskóla og miðuðust við bandarískt samfélag. Hulda segir að þó sé einnig hægt að líta á niðurstöðurnar í samhengi við íslenskt samfélag eftir hrun.
Hulda Þórisdóttir
Ótti almennings hefur áhrif á stjórnmálaviðhorf og getur valdið íhaldssömum skoðunum.
„Hugarlokun“ er það lykilhugtak sem Hulda notar. Hún segir að rannsóknir hafi sýnt að þegar fólk finni fyrir ótta þá séu fyrstu viðbrögð þess að reyna að losa sig við hann. Þá vilji það lausn sem liggi beint við.
„Ef þetta er heimfært yfir á stjórnmál þá eru það íhaldssamar skoðanir sem fólk grípur þegar óttinn stjórnar því. Rannsóknir hafa sýnt að hægrimenn leitist frekar en vinstrimenn við að lágmarka ótta og hafa stjórn. Það hefur aldrei tekist að sýna fram á þetta í sama mæli hjá vinstrimönnum," segir Hulda. Hún segir að bæði fjölmiðlar og stjórnmálamenn vestanhafs séu meðvitaðir um hve sterkt það geti verið að vekja upp ótta hjá fólki. „Repúblikanar hafa notað þetta með góðum árangri í sínum kosningaherferðum til að hafa áhrif á almenning og það virðist hafa fært þeim fylgi," segir Hulda.
Á ýmsan hátt er hægt að heimfæra niðurstöðurnar yfir á Ísland eftir hrun, segir hún. „Fólk var óttaslegið í kjölfar hrunsins og er enn. Kom þá fram ákveðin íhaldssemi í hegðun almennings. Áhersla jókst t.d. á hið þjóðlega og nú síðar hefur ríkt almenn mótstaða við hið óþekkta,eins og að ganga í ESB.“