Magnús Sveinn Helgason, sagnfræðingur hjá Miðstöð munnlegrar sögu
„Í rannsókninni, sem byggist á því að safna viðtölum við meira en 100 Íslendinga hvaðanæva af landinu úr ólíkum hópum og stéttum, er kannað hvernig Íslendingar upplifðu og glímdu við efnahagshrunið 2008, aðdraganda þess og eftirmál og hvaða pólitíska skilning þeir hafa lagt í þessa atburði. Markmiðið er að leita svara við því á hvaða hátt atburðir vetrarins 2008-2009 hafi markað söguleg kaflaskil í persónulegu lífi Íslendinga,“ segir Magnús Sveinn Helgason.
Rannsókn hans ber heitið „Kreppusögur: Reynsla Íslendinga af efnahagskreppunni 2008- 2009 og hugmyndir þeirra um áhrif hennar á fjölskyldu, stjórnmál og samfélag.“ Rannsóknin er unnin á vegum Miðstöðvar munnlegrar sögu og veitir Guðmundur Jónsson, prófessor í sagnfræði, henni forstöðu.
Magnús Sveinn Helgason
„Í rannsókninni, sem byggist á því að safna viðtölum við meira en 100 Íslendinga hvaðanæva af landinu úr ólíkum hópum og stéttum, er kannað hvernig Íslendingar upplifðu og glímdu við efnahagshrunið 2008, aðdraganda þess og eftirmál og hvaða pólitíska skilning þeir hafa lagt í þessa atburði.“
Magnús Sveinn segir kveikju vinnunnar hafa verið atburðina haustið 2008 þegar ljóst var að Íslendingar væru að verða vitni að stórsögulegum atburðum sem ættu eftir að hafa mikil og langvarandi áhrif á daglegt líf og samfélagsþróun. „Hér urðu söguleg kaflaskil. Okkur þótti því mikilvægt að öðlast dýpri skilning, bæði á því hvernig þessir atburðir birtust í daglegu lífi fólks en ekki síður hvernig þeir mótuðu skilning fólks á samfélaginu. Þá þótti okkur mikilvægt að rannsaka upplifun almennings á þessum atburðum, meðan afleiðingar hrunsins og kreppunnar eru ekki fyllilega ljósar,“ segir Magnús Sveinn.
Niðurstöður eru komnar fram að hluta. „Það er margt sem hefur komið okkur á óvart. Eitt af því sem er hvað mest sláandi er hversu lítið traust almenningur hefur til stjórnmálamanna. Á sama tíma er athyglisvert að fólk hefur ekki misst trú á lýðræðið sem slíkt, það eru jafnvel merki um aukinn áhuga á lýðræðislegri þátttöku. Fólk hefur til dæmis orðið mun jákvæðara í garð mótmælaaðgerða en áður. Nokkrir viðmælendur okkar töluðu í þessu sambandi um mikilvægi þess að veita stjórnmálamönnum beint aðhald, ella gleymi þeir fyrir hverja þeir vinna,“ segir Magnús Sveinn.