Jörundur Svavarsson, prófessor í sjávarlíffræði og starfsmaður við Rannsóknasetur Háskóla Íslands á Suðurnesjum
„Sögu við ætlum að segja í kvöld um sæfarann Jörund hinn knáa,“ segir í frægum dægurlagatexta Jónasar Árnasonar um Jörund hundadagakonung. Ofangreindar línur gætu þó vel átt við Jörund Svavarsson, prófessor í sjávarlíffræði.
Hann tók haustið 2011 þátt í mánaðarlöngum leiðangri þýska rannsóknaskipsins Meteor í kringum Ísland og aflaði gagna um botndýr við Íslandsstrendur fyrir fjölþjóðlegt rannsóknarverkefni, IceAGE (Icelandic Animals, Genetics and Ecology). „Markmiðið er að kanna erfðafræði og vistfræði botndýra við Ísland, bæði á djúp- og grunnslóð. Vistfræðirannsóknirnar beinast m.a. að því að kanna útbreiðslu tegunda og beita líkönum til að meta þá umhverfisþætti sem móta útbreiðsluna. Þegar ljóst er hvaða umhverfisþættir eru mest mótandi er m.a. unnt að nota gögn sem þessi til að spá fyrir um breytingar á útbreiðslu tegunda af völdum breytinga á hitastigi sjávar á norðurslóðum,“ segir Jörundur.
Jörundur Svavarsson
„Markmiðið er að kanna erfðafræði og vistfræði botndýra við Ísland, bæði á djúp- og grunnslóð.“
Fyrra samstarf Jörundar við sjávarlíffræðinga við háskólana í Hamborg og Björgvin varð kveikjan að rannsókninni. „Fyrri rannsóknir leiddu m.a. í ljós að margir dýrahópar á Íslandsmiðum eru enn ákaflega illa þekktir og í ljósi þess að miklar breytingar eru í vændum á norðurslóðum er nauðsynlegt að afla sem mestra grunnupplýsinga um þessa dýrahópa, svo sem um tegundasamsetningu og útbreiðslu
tegundanna,“ segir Jörundur enn fremur.
Talsverðan tíma tekur að vinna úr sýnunum sem safnað var í Meteor-leiðangrinum svo að nokkur tími mun líða þar til niðurstöður liggja fyrir. „Sýnin voru hins vegar ákaflega vel heppnuð og því er óhætt að fullyrða að fjölmargt forvitnilegt muni koma út úr þessum rannsóknum. Í leiðangrinum fundust m.a. margar sjaldgæfar tegundir og erfðafræði þeirra verður nú unnt að rannsaka,“ segir Jörundur að lokum.