Hildur Blöndal Sveinsdóttir, doktorsnemi í fjölmenningarfræði.
„Íslendingar sem búsettir hafa verið erlendis og nemendur með innflytjendabakgrunn virðast hafa það sem ég kalla hnattræna vitund,“ segir Hildur Blöndal, doktorsnemi í fjölmenningarfræði. „Með doktorsrannsókn minni langar mig að kanna hvernig einstaklingar sem búa við hnattrænan hreyfanleika nýta sér þá reynslu og hvaða lærdóm megi draga af henni. Það er tímabært að skoða fremur jákvæðar hliðar fólksflutninga þar sem þeim neikvæðu hafa þegar verið gerð ágæt skil,“ segir hún.
Hildur Blöndal Sveinsdóttir
„Með doktorsrannsókn minni langar mig að kanna hvernig einstaklingar sem búa við hnattrænan hreyfanleika nýta sér þá reynslu og hvaða lærdóm megi draga af henni.“
Þátttakendur í rannsókninni stunda nám í framhaldsskóla og háskóla og eru bæði íslenskir nemendur sem búsettir hafa verið erlendis og nemendur með innflytjendabakgrunn. „Kveikjan að rannsókninni á sér rætur í eigin reynslu af búsetu erlendis, bæði sem barn og fullorðin og sem foreldri barna með þessa reynslu. Mig langar að skilja betur hvað það er í ferlinu sjálfu við það að flytja á milli landa sem hefur mótandi áhrif á einstaklinginn, hæfni hans og lífssýn. Ég velti líka fyrir mér hugmyndum um hvaða færni er mikilvægt að nemendur búi yfir á 21. öldinni til að geta tekið virkan þátt í hnattrænu lýðræðisþjóðfélagi,“ útskýrir Hildur.
Að sögn Hildar felst gildi rannsóknarinnar m.a. í því að rannsaka tvo hópa þátttakenda sem hluta af heild í stað þess að aðgreina þá eins og gert hefur verið í fyrri rannsóknum. „Þá er rannsókninni ætlað að breikka umræðugrundvöll um menningarlegan margbreytileika og þann auð sem í honum felst, ekki síst í ljósi þess að fólksflutningar hafa víða samfélagslega skírskotun sem snertir bæði þá sem flytja og þá sem heima sitja,“ segir Hildur.
Leiðbeinendur: Hanna Ragnarsdóttir, prófessor við Uppeldis- og menntunarfræðideild, og Audrey Osler, gestaprófessor frá Högskolen í Buskerud University College og University of Leeds.