Gögn sem Birna Arnbjörnsdóttir, prófessor í annarsmálsfræðum, safnaði í doktorsnámi sínu fyrir rúmum aldarfjórðungi ganga í endurnýjun lífdaga í verkefni sem er ætlað að auðvelda rannsóknir og samanburð á þróun íslensku í Vesturheimi og á Íslandi.
Birna Arnbjörnsdóttir
„Hluti doktorsverkefnis míns var að rannsaka málbreytingar í vesturíslensku, sérstaklega þróun flámælis, sem er mjög áberandi í máli Vestur- Íslendinga.“
„Hluti doktorsverkefnis míns var að rannsaka málbreytingar í vesturíslensku, sérstaklega þróun flámælis, sem er mjög áberandi í máli Vestur-Íslendinga. Í þeim gögnum sem safnað var í Íslendingabyggðum árið 1986 voru mörg dæmi um aðrar málbreytingar sem ekki voru rannsakaðar frekar á þeim tíma. Gögnin eru byggð á viðtölum þar sem reynt var að draga fram eðlilegt talmál. Markmiðið með verkefninu nú er að skrá gögnin og sameina þau gagnabanka um íslenskt talmál, ÍsTal. Sameining í einn gagnabanka mun auðvelda frekari rannsóknir og samanburð á þróun íslensku og vesturíslensku,“ útskýrir Birna.
Hún segist fyrst hafa kallað eftir frekari rannsóknum á vesturíslensku fyrir 20 árum en nú, m.a. fyrir tilstilli styrkja frá Stofnun Vigdísar Finnbogadóttur í erlendum málum og rannsóknasjóðum Háskóla Íslands og Rannís, sé sú vinna loks hafin. „Góður gagnagrunnur gefur mikla möguleika á rannsóknum á vesturíslensku sem erfðamáli, tvítyngi og málskiptum,“ segir Birna.
Hún segir gagnabankann þegar hafa verið notaðan í meistaraverkefni nemanda við Háskóla Íslands og við ritun vísindagreina. „Rannsóknir tengdar vesturíslensku eru ekki síst mikilvægar því þær geta gefið vísbendingar um málbreytingar sem verða í návígi við annað tungumál. Hugsanlega gefur þróun vesturíslensku vísbendingar um breytingar á málfræði og orðasafni íslensku í návígi við ensku á Íslandi,“ segir Birna.