Kristján Jóhann Jónsson, dósent við Kennaradeild
„Ýmsar kannanir benda til þess að viðhorf til íslensku sé að breytast, vinsældir námsgreinarinnar minnki og æ fleiri telji góða íslenskuþekkingu gagnslitla. Þetta kemur einnig fram í skipulagningu kennaramenntunar,“ segir Kristján Jóhann Jónsson, dósent í íslensku við Kennaradeild. Hann bendir einnig á að íslenskukennsla hafi lítið verið rannsökuð og því hefur hann, ásamt hópi annarra fræðimanna, ráðist í heildarrannsókn á íslensku í skólakerfinu, bæði sem námsgrein og kennslutungu.
Kristján Jóhann Jónsson
„Ýmsar kannanir benda til þess að viðhorf til íslensku sé að breytast, vinsældir námsgreinarinnar minnki og æ fleiri telji góða íslenskuþekkingu gagnslitla. Þetta kemur einnig fram í skipulagningu kennaramenntunar“
„Tungumálið stendur frammi fyrir áskorunum; lestur ungs fólks virðist almennt fara minnkandi og íslenskt málsamfélag þarf, eins og önnur fámenn málsamfélög, að laga sig að gríðarlegu magni af enskum texta sem einkum berst með rafrænum miðlum. Íslenskan er ekki sérstök að þessu leyti heldur á hún samleið með fjölmörgum öðrum tungumálum,“ segir Kristján.
Í rannsóknarhópnum eru íslenskukennarar frá Háskóla Íslands og Háskólanum á Akureyri ásamt doktors- og meistaranemum. Þar að auki hafa kennarar frá þremur háskólum á Norðurlöndum lýst áhuga á að tengjast rannsókninni með eigin tungumál í huga.
„Meginmarkmiðið er að varpa ljósi á stöðu íslensku í skólum með því að kanna stefnumörkun, námsefni, starfshætti og viðhorf nemenda, kennara og stjórnenda. Við bindum vonir við að geta nýtt niðurstöðurnar sem grunn að þróunarstarfi í skólum og kennaramenntun með stuðningi rannsóknarhópsins,“ segir Kristján. „Við viljum líka vita að hvaða marki veruleiki skólastofunnar samræmist hugmyndum skólayfirvalda um nám og kennslu íslensku sem móðurmáls.“
Gagna er aflað í tíu grunnskólum og fimm framhaldsskólum og verða þau greind með hliðsjón af þrískiptingu Aristótelesar á menntun: í þekkingu, hæfni og hyggjuvit, og verður þessi skipting löguð að rannsókninni.