Teitur Jónsson, dósent við Tannlæknadeild
„Sú aðferð að færa tennur til í munni með skurðaðgerð hefur verið notuð lengi, oftast vegna þess að framjaxla hefur vantað frá fæðingu eða vegna þess að framtennur hafa orðið fyrir áverka og tapast. Horfur á að tennur sem græddar hafa verið í fólk endist eru allgóðar en mjög fáar rannsóknir hafa verið gerðar áratugum eftir ígræðslu,“ segir Teitur Jónsson, dósent í tannréttingum, sem nú rannsakar slíkar ígræðslur. Markmiðið er að afla upplýsinga um endingu og heilbrigði ígræddra tanna sem helst eiga að koma að gagni ævilangt.
Teitur Jónsson
„Sú aðferð að færa tennur til í munni með skurðaðgerð hefur verið notuð lengi, oftast vegna þess að framjaxla hefur vantað frá fæðingu eða vegna þess að framtennur hafa orðið fyrir áverka og tapast.“
Viðfangsefninu kynntist Teitur í framhaldsnámi við Óslóarháskóla, sem stendur framarlega í rannsóknum á þessu sviði. Aðferðina fór hann síðan markvisst að nota hér heima í tengslum við tannréttingar. Röntgenmyndum og klínískum athugunum safnaði hann kerfisbundið frá upphafi og því er hægt að byggja rannsóknina á gagnagrunni sem hefur stækkað jafnt og þétt í rúma þrjá áratugi.
Niðurstöður birti Teitur fyrst í vísindagrein 2004 þegar fylgst hafði verið með ígræddu tönnunum í tíu ár að meðaltali og voru þá 92% þeirra án nokkurra sjúkdómseinkenna. Með framhaldsrannsókn sem nú er að hefjast verður hægt að meta endingu og heilbrigði þessara tanna á enn lengra tímabili og bera saman við endingu annarra tanna í sama munni. „Rannsóknin lýsir langtímahorfum ígræddra tanna en á Íslandi er slík gagnasöfnun auðveldari en víðast annars staðar. Aðferðin er í vissum vel skilgreindum tilvikum besti valkosturinn, til dæmis í samanburði við tannplanta úr málmi, sem einnig eru notaðir til að fylla skörð sem stafa af tannáverkum eða meðfæddri tannvöntun,“ útskýrir Teitur.
„Spurningakönnun meðal þátttakenda er nýlokið og sýna niðurstöður hennar að yfirgnæfandi meirihluti svarenda er sáttur við útlit, staðsetningu og aðra eiginleika ígræddu tannanna. Aðeins örfáir hefðu kosið að leysa vandamálið á annan hátt,“ segir Teitur.