Kjartan Maack, meistaranemi við Viðskiptafræðideild
„Ég hef brennandi áhuga á árangursstjórnun og vildi því sjá hvað það er sem skilar fólki árangri og hvernig má styðja það við að ná árangri. Meistararannsóknin mín snerist um að greina einkenni sigursælla liða og var hún gerð með átta ítarlegum viðtölum við leiðtoga slíkra liða. Þar af voru fimm leiðtogar íþróttaliða og þrír úr fyrirtækjateymum,“ segir Kjartan Maack, sem leitaði í meistaraverkefni sínu að ástæðu þess að sumir ná framúrskarandi árangri en aðrir ekki.
Kjartan Maack
„Ég hef brennandi áhuga á árangursstjórnun og vildi því sjá hvað það er sem skilar fólki árangri og hvernig má styðja það við að ná árangri. Meistararannsóknin mín snerist um að greina einkenni sigursælla liða og var hún gerð með átta ítarlegum viðtölum við leiðtoga slíkra liða.“
Kjartan bendir á að það hafi oft vakið athygli sína að sjá fótboltalið kaupa hverja stórstjörnuna á fætur annarri án þess að ná góðum árangri í kjölfarið. „Því hlýtur að vera eitthvað meira en hæfileikar og færni liðsmanna sem ræður því að sum lið ná góðum árangri en önnur ekki. Hugarfar liðsmanna og leiðtoga skapar undirstöður framúrskarandi árangurs liða,“ segir Kjartan. „Sigursæl lið bera flest einkenni uppbyggilegs andrúmslofts, uppbyggilegra sambanda, uppbyggilegra samskipta og uppbyggilegs tilgangs. Þau leggja mikla áherslu á undirbúning með skýrum tilgangi og sveigjanlegri stefnu. Markmið þeirra eru háleit og skýr og árangur þeirra er vandlega skilgreindur og mældur. Þekking og hugmyndir flæða frjálst innan liðanna og liðsmenn styðja hver annan. Liðsmenn sýna frumkvæði í liðsvinnu með árangursríkum hætti.“
Kjartan segir að niðurstöður rannsóknarinnar gefi vísbendingar um þær áherslur sem ríki hjá leiðtogum sigursælla liða. „Liðsumhverfið einkennist af uppbyggilegri endurgjöf með áherslu á sérstöðu og styrkleika hvers liðsmanns. Rannsóknin sýnir að leiðtogar liða sem vilja ná árangri þurfa að ná fram því besta í hverjum og einum. Til þess þurfa þeir að einblína á sérstöðu einstaklinganna. Umhverfið þarf þannig að styðja við hæfileika einstaklinganna.“
Kjartan segir að rannsóknin sýni tengsl uppbyggilegra stjórnunaraðferða við framúrskarandi árangur og tengi þannig saman stjórnunarfræðin og fræði jákvæðrar sálfræði. „Niðurstöðurnar hafa ótvírætt gildi fyrir samfélagið í heild því að hægt er að styðjast við niðurstöðurnar hvar sem hópar fólks koma saman til að ná góðum árangri.“
Leiðbeinandi: Árelía Guðmundsdóttir, dósent við Viðskiptafræðideild.