Ólafur Páll Jónsson, dósent við Uppeldis- og menntunarfræðideild
„Ég hef reynt að átta mig á því hvernig skólar geti verið lýðræðislegir, hvernig líf í skóla geti verið þátttaka í lýðræðislegu samfélagi og hvernig skólaganga geti undirbúið nemendur fyrir áframhaldandi líf í lýðræðissamfélagi,“ segir Ólafur Páll Jónsson, dósent í heimspeki við Menntavísindasvið, um rannsókn sína sem fjallar um menntun til lýðræðis.
Rannsóknin er byggð á hugmyndum sem hafa verið þróaðar undir yfirskriftinni rökræðulýðræði. Þær hugmyndir byggjast öðru fremur á lýðræðislegri samræðu í formi opinnar rökræðu þar sem forsendur taka mið af því sem viðmælendur geta fallist á frekar en einungis sannfæringu þess sem talar.
Ólafur Páll Jónsson
Rannsóknin er byggð á hugmyndum sem hafa verið þróaðar undir yfirskriftinni rökræðulýðræði. Þær hugmyndir byggjast öðru fremur á lýðræðislegri samræðu í formi opinnar rökræðu þar sem forsendur taka mið af því sem viðmælendur geta fallist á frekar en einungis sannfæringu þess sem talar.
„Auðvelt er að segja margt almennt um samband menntunar og lýðræðis en flóknara er að benda á hvernig kennsla í einstökum greinum getur verið lýðræðisleg, hvers konar nám sé eiginlegt lýðræðislegt nám og hvernig það býr nemendur undir áframhaldandi líf í lýðræðislegu samfélagi,“ segir Ólafur Páll.
Hann segist hafa fengið tækifæri til að skoða hugmyndir um hvað geri skóla lýðræðislegan með þessum hætti þegar honum bauðst að starfa með doktorsnemum á sviði listgreinamenntunar og stærðfræðimenntunar. „Þetta var einfaldlega of gott tækifæri til að láta það fram hjá sér fara.“
Ólafur Páll segir að niðurstöður liggi ekki enn fyrir en rannsóknin miði að því að skilja betur hvað lýðræðislegur skóli er og skoða ákveðna möguleika á því að vinna lýðræðislega í stærðfræðimenntun og listgreinakennslu. „Þessi rannsókn getur vonandi orðið eitt skref í þá átt að skilja hvað lýðræði er og gera það að veruleika í samfélaginu,“ segir Ólafur Páll.
