Hrönn Egilsdóttir, doktorsnemi við Jarðvísindadeild
„Fyrir Ísland, sem byggir afkomu sína á sjávarfangi, gæti súrnun sjávar verið mun alvarlegra vandamál en hlýnun jarðar,“ segir Hrönn Egilsdóttir, doktorsnemi í sjávarlíffræði. Talað er um að sjór súrni þegar styrkur koldíoxíðs í honum eykst og sýrustig hans (pH-gildi) lækkar. „Fyrir 250 milljónum ára dóu 95% sjávarlífvera út, líklega í kjölfar þess að koldíoxíð jókst mjög í andrúmslofti og sjó, ekki ósvipað því sem nú á sér stað af manna völdum.“
Hrönn Egilsdóttir
„Fyrir Ísland, sem byggir afkomu sína á sjávarfangi, gæti súrnun sjávar verið mun alvarlegra vandamál en hlýnun jarðar“
Hrönn segir óumdeilt að sjórinn taki við um 30 prósentum af því koldíoxíði sem til fellur vegna bruna jarðefnaeldsneytis. „Jón Ólafsson, prófessor í haffræði, og hans teymi hafa safnað gögnum í sjónum umhverfis Ísland frá 1984. Þetta eru einstök gögn vegna þess að fáir vísindamenn stunduðu mælingar á koldíoxíði í sjó á þessum tíma. Þau sýna svart á hvítu hversu hraðar breytingarnar hafa
verið. Samanburður þessara gagna við gögn frá öðrum stöðum á jörðinni sýnir að sjórinn norðan við Ísland súrnar talsvert hraðar en sunnar í heiminum,“ segir Hrönn.
„Því er spáð að skelfiski, t.d. samlokum eins og kræklingi, hörpuskel og ígulkerum, standi veruleg ógn af súrnun sjávar á næstu öldum,“ segir Hrönn. Þetta á líka við um rauðþörunga, snigla, lindýr og kóralrifin sunnan við Ísland. „Kórallarnir eru í raunverulegri hættu vegna súrnunar sjávar. Þetta er auðvitað stórmál fyrir íslenskan efnahag vegna þess að kóralrifin eru talin vera uppeldisstöðvar
fyrir fisk sem við treystum á til manneldis og útflutnings. Vegna þess að Ísland hefur mikilla hagsmuna að gæta eigum við að bregðast við strax og ganga á undan öðrum þjóðum með góðu fordæmi enda ættum við auðvelt með að verða umhverfisvænasta land í heimi,“ segir Hrönn enn fremur.
Leiðbeinandi: Jón Ólafsson, prófessor við Jarðvísindadeild.