Hafsteinn Einarsson, BS-nemi við Raunvísindadeild
„Það er mjög gefandi að hrinda eigin hugmynd í framkvæmd,“ segir Hafsteinn Einarsson sem stundaði nám í stærðfræði við Háskóla Íslands með áherslu á tölvunarfræði þegar hann réðst í rannsóknarverkefni sitt, „Bestun á staðsetningu hleðslustaura.“ Hugmyndin kviknaði með þátttöku í Gullegginu, frumkvöðlakeppni íslenskra háskólanema, árið 2011. Í framhaldinu fékk hann styrk hjá Nýsköpunarsjóði námsmanna til að halda áfram með verkefnið og var það m.a. tilnefnt til Nýsköpunarverðlauna forseta Íslands árið 2012.
Rannsóknin gengur út á bestun og snýst um að finna bestu lausn á tilteknu verkefni. Hafsteinn vann að því að finna út hvar best væri að staðsetja hleðslustaura fyrir rafbíla á höfuðborgarsvæðinu svo að staurarnir yrðu sem næst rafbílanotendum. „Það reyndist erfitt að finna bestu lausn á verkefninu svo að ég notaðist við nálgunaraðferð. Besta lausn krefst oft gífurlegra útreikninga og eru nálgunaraðferðir flokkur aðferða sem gefa lausn sem er nálægt þeirri bestu. Verða útreikningar mun ódýrari fyrir vikið,“ segir Hafsteinn.
Hafsteinn Einarsson
Hafsteinn vann að því að finna út hvar best væri að staðsetja hleðslustaura fyrir rafbíla á höfuðborgarsvæðinu svo að staurarnir yrðu sem næst rafbílanotendum.
Rannsóknin var gerð með því að mæla eftirspurn, forrita, greina gögn og setja upp líkan svo að eitthvað sé nefnt. Þátttakendur staðsettu pinna á korti sem sýndu heimili þeirra, vinnustað og vettvang tómstunda. „Þá notaðist ég við klasagreiningaraðferðir en klasar eru þeir punktar þátttakenda sem liggja þétt saman og sýna eftirspurnina eftir hleðslustaurunum,“ segir Hafsteinn.
Niðurstöður sýna helstu álagspunkta, þ.e. þá staði þar sem mesta eftirspurnin er eftir rafhleðslustaurum í Reykjavík en alls hafa 975 manns tekið þátt í könnuninni hingað til. Könnunin er enn opin á vefsíðunni hledslustaurar.org/ og uppfærast niðurstöður í hvert sinn sem einhver tekur þátt í henni.
„Rannsóknin hefur samfélagslegt gildi sem eykur hamingju þeirra sem notast við rafbíla,“ segir Hafsteinn en rannsóknin eykur auðvitað einnig hagkvæmni við rekstur rafbíla. „Nokkur verkfræðifyrirtæki hafa sýnt gögnunum áhuga og skoða í kjölfarið svipuð verkefni.“
Hann bendir á að verkefnið sé ekki einskorðað við hleðslustaura, „það mætti t.d. gera svipaða greiningu fyrir strætisvagnaferðir í Reykjavík,“ segir Hafsteinn að lokum.
Leiðbeinandi: Steinn Guðmundsson, lektor við Iðnaðarverkfræði-, vélaverkfræði- og tölvunarfræðideild.